Lada ngi duh noh ka khyndew ngi la duh ïa ka ri,sha khappud ka them Marwet pynskhem ka HANM ïala ki shipai

Nongpoh, K’Lyngkot 08: Ka seng Hynniewtrep Achik National Movement (HANM) mynta ka sngi kala ïoh ban pynskhem ïala ki jong ki shipai ba pura ki ban peitngor sha ki thaiñ khappud bad ka jylla Assam kaba la tip kum ka HANM Marwet Circle haka jingïalang kaba la long ha Upper Jorbil Killing.
Ki nongïalam ba thymmai jong ka Marwet Circle kiba la bam smai mynta ka sngi naka bynta ka samoi treikam jong u snem 2026-29 ki kynthup ïa u Petrus Marak kum u President, u Bah Makstar Tynsong General Secretary, Petre Marak adviser bad kiwei ki nongïalam bad ki dkhot katei ka circle bad ïa kitei ki nongïalam ba thymmai la leit ban pynskhem bad pynbam smai pura da u Bah Lamphrang Kharbani President ba rangbah ka HANM sengkmie, haka jingdonlang u Vice President Bah Moon Dhar, Lewin syiemsad, ki nongïalam na District kiba kynthup ïa u Bah David Joy Kharjahrin Bah Sumarlang lyngdoh Vice President Ri-Bhoi District bad kiwei de ki nong ïalam naka sengkmie bad na Ribhoi District.
Haba kren ha kane ka sngi naka liang ki nongïalam ka seng kila kren bad pynshai ruh ïaka nongrim jong ka seng haka ktien Khasi, Pnar bad Garo namar ki jaitbynriew ha kattei ka thaiñ kiba la khleh bad imlang kum shipara bad kum ki nongïalam ka seng ki don ka jingkyrmen bad ka jingshngaiñ halor ka jingmih shakhmat ki khun samla ki ban long kum ki nongïada khamtam ka thaiñ khappud bad ka Assam lada ym don kitei ki jaitbynriew khasi, pnar bad Garo bun ki jaka khappud kila shah klun bad lut khaid.
Kila ong ruh ba ka sorkar ka dei ban phaikhmat khambun ban theh ki kam pynroi sha ki thaiñ khappud namr wat haba dang don ki jaitbynriew na kane ka jylla kiba shong ba sah ha khappud ka Assam ka shlan ban tur pud bad pynthud wat ki kam pynroi lada khlem kitei ki jaitbynriew jong ngi lei kiba shong ba sah ha katei ka jaka bun ki jaka kila lut kumta ngi dei ban ai mynsiem ïaki nongshong shnong ha katei ka thaiñ naduh ki Garo, ki Khasi bad Pnar.
“Kumba ka seng HANM kadei ka seng kaba ju peit ïa u pud u sam bad pynneh ïaka riti ka dustur, ngi ai mynsiem ba phin long kum ki nongpeitngor ïala ka jong ka khyndew ka shyiap bad ka riti ka dustur namar ka HANM ka kheiñ ba ka Khyndew ka dei ka ri bad lada ngi duh ïaka khyndew ngila duh noh ïaka ri” la ong ki nongïalam da kaba kyntu ruh ïa kitei ki nongïalam ba thymmai ka Marwet Circle ba kim dei ban ailad ïaki bar jylla ban tuh lut wat ka kamai kajih ban rah bad khlong na kane ka jylla hynrei ban ïada ïaki bad ka jinglong trai baroh, kila bynrap.