Shillong, Jylliew, 18: U General Secretary jong ka Voice of the People Party (VPP) u Dr Ricky AJ Syngkon u la ong ba lada u pyrkhat tang ïa ka malade um donkam shuh ban dang mih shakhamt ban ïakhun na bynta ka ka kam ka jam namar ïa lade hi u la biang ka kam hynrei u ong dei namar ka mynsiem ban shu peit kai ïa ka ka jinglong jingman ka jylla kam ailad ïa u ban long nongpeit kai.
Haba kren ha ka jingïalang pynrung dkhot ka VPP ha Umsning u Dr Ricky u la ong, “Nga dei u nonghikai ha NEHU bad ka jingsiew ka la biang bad ngam donkam shuh ban dang khuslai eiei lada nga pyrkhat tang ïa ka malade hynrei namar ka mynsiem kam ailad ïa nga kum u nonghikai ka pynlong ïa nga ban snohkit bad ka VPP ban kyllur ïa ki lyngkha ba eh ban ai ïa ki longdien ïa ka lawei kaba shngaiñ”.
U la ong ruh ba kum u nongshong shong ka jylla bad ka them Ri-bhoi u pangnud ban ïohi ba ka thaiñ bad ka jylla kam kiew kumba ka dei hok ban kiew ha baroh ki liang.
“Ngin peit ïa ka them Ri-bhoi ka don bun ki ki ophis treikam babun jong ka sorkar India, ka don ka kad liengsuiñ, ki karkhana bad ka khyndew ruh kaba seisoh ban nujor bad kiwei ki bynta jong ka jylla, hynrei sngewsih ba ha ki 51 snem kum ka jylla bad 31 snem ka jingïoh ïa ka District ngim ïohi ïa ka jingkiew bad ka jingïoh jingmyntoi jong ngi bad ka daw lada ngi tih tynrai ka dei namar ki nongsynshar kim don ka jingïohi jngai ïa ka lawei naduh kito ki snem,” u la bynrap.
U la ong ruh ba ka jinghap ka Ri-bhoi kum kata ka Aspirational District ka dei kaba hap ban sngewrem namar hadien 31 ki snem ba ka la ïoh ïa ka District ka dang hap ha kane ka thup hynrei ha ka jingshisha ka la dei ban dei ka district kaba la tam duh ban ïa kiwei namar ka jingkyrkhur kaba u Blei u la theh sei da ki jingdon jingem ka mariang.
