Lada nga jop MDC na Umroi, ngan long u nongïada lyngba ki aiñ ïa ka hok ki trai muluk : George B. Lyngdoh

Nongpoh, Rymphang 10: U Bah George B. Lyngdoh, MLA barim ka Umroi Constituency bad uba ïa khun ruh kum u kyrtong shimet ha kane ka election MDC na Umroi Constituency, u la pynpaw ba u don kata ka mynsiem jong ka jingsngewskhem ban jop ha kane ka election MDC na Umroi Constituency, wat la u la mih ruh ban aireng kum u kyrtong shimet khlem da ïa khun na kano kano ka party saiñ hima sima.
Haba ïa kren bad ki Nongthoh Khubor, u Bah George B. Lyngdoh u la ong, ka daw kaba la pynlong ïa u ban ïa aireng ha kane ka election MDC kum u kyrtong shimet, ka dei halor ka nongrim ba bun ki paid nongkyrshan ki la ai mynsiem ba u dei ban ïa khun ïa kane ka election MDC na Umroi, namar ka Umroi Constituency ka dang donkam ïa u nongïalam uba la shemphang ban shakri ïa ki paidbah ka Constituency bad kumjuh ruh ïa ki trai muluk ki trai jaka hapoh ka jylla.
“Nga mih ba ïa khun kum u kyrtong shimet ruh ka dei namar ba nga don shibun ki jingangnud ban pynjanai ïa ki aiñ kiba ai ka jingïada kyrpang ïa ki trai muluk ki trai jaka, ha kaba lada ki paidbah kin pynjop ba un ioh rung ha ïing Dorbar thaw aiñ ka KHADC, ka kam ram ka long ban saindur ne pynjanai ïa ka jingtreikam ban ïada ïa ka hok long briew man briew ki trai muluk ki trai jaka” ong u Bah George B. Lyngdoh.
U la ong ruh kawei kaba u da sngewkhia ka dei ka jingshah khñiot ki trai muluk ki trai jaka ha ka liang ka kam khaïi ka pateng ba kane ka la ktah jur ïa ki trai muluk ki trai jaka, bad kumba la sakhi haduh mynta ka jingai pathar ïa ki Trading bad ki Labour License sha ki bar jylla, ka la pynïap jakpoh ïa kiba bun ki trai muluk ki trai jaka ha ka liang ka khaïi ka pateng.
“Ngi donkam ban pynjanai pura ïa ka jingtreikam ban kyntiew shuwa ïa ki trai muluk ki trai jaka ha ka liang ka khaïi ka pateng, namar shisien ba ki briew kiba nabar ki ioh bsuh khlieh ha ki kam khaïi pateng, ka la long shisha ka jingma kaba khraw ïa ki trai muluk ki trai jaka” ong u Bah George B. Lyngdoh bad bynrap ruh kumba long haduh mynta kim da don eh kita ki jingpyrkhing ïa ki briew kiba wan na shabar ban rung ha ki kam khaïi pateng bad dei namar kane ka daw ki trai muluk ki trai jaka ki shah khñiot ha baroh ki liang ha ka kam khaïi pateng” u la bynrap.
Shuh shuh, u la bynrap ruh da kaba ong kumba ki paidbah ka Umroi Constituency ki la ai mynsiem ïa u ban ïa khun beit ha kane ka election, ha kaba lada ki paidbah ki pynjop ïa u kum u MDC, un peit kham kyrpang ïa ka Constituency bad ban shim ruh ïa kata ka jingkitkhlieh ban dang pynjanai ïa ki jingtreikam lane lada donkam ban thaw aiñ, na ka bynta ban thaw ïa kita ki lad jingïada kiba pynkupbor shwa ïa ki trai muluk ki trai jaka, khnang ba lada ki trai muluk ki trai jaka ki kiew ha ka khaïi ka pateng bad ha kiwei kiwei ki bynta jong ka jingim briew, ngi lah ruh ban pynkhlaiñ ïa ka jingskhem bad ka jingkiew shaphrang ka jaid bynriew Khasi-Pnar jongngi, u la bynrap.