Shillong, Nailar, 18 : Da kaba kubur ba ka la don ka jingïakren hapdeng ka party National People’s Party (NPP) na ka bynta ka elekshon kaban long ha u 2023, u MLA ka Mylliem Bah Hamlet Dohling u la ong ba dei ki nongïalam kiba pynjop ïa u bad kumta shaba leit ma ki shata un don lang.
“Mynta ka jingïakren bad ki nongïalam jong nga ka dang don kam pat dei ka rai kaba khatduh bad hapdeng ka NPP ruh ka jingïakren ka dang don kam pat dei kaba ngi la dep shim rai,” ong u Bah Hamlet ba dei ruh u Myntri Sorkar ka jylla haba kren bad ki lad pathai khubor.
Utei u MLA u ong ruh ba baroh ki tip ba ka elekshon ka dei kaba hap ban ïaid ryngkat ryngkat bad ki nongïalam bad khlem ma ki u MLA u sah marwei. “Ka long kaba donkam ban da ïoh lang ïa ka sur ki nongïalam na baroh ki shnong bapher bapher ban ïarai lang ïa kano kano ka kam.”
Haba pynshai pat halor ka jingkynnoh ba ki don arngut ki MLA ka PDF ba kynthup lang ïa u ban ym ïakhun shuh na katei ka party, u Bah Hamlet u la ong, “Ka jingshai ne bym shai ka long ba haduh mynta ym pat kut ka jingïakren. Dei ynda la kut ka jingïakren baroh kan sa shai.”
Nalorkata, u ïai ban ruh da kaba ong ba ka jingïakren haduh mynta halor katei bynta ka dang don hapdeng jong u bad ki nongkyrshan bad ruh bad ka NPP.
La katta ruh u ong ba namar ka elekshon ka la jan kumta shen un sa lum noh ïa ka jingïalang bad ki nongïalam kiba hakhmat ban ïa kren sani noh.
Katkum ka jingïathuh jong u Bah Hamlet, ki don bun bha kiwei ruh ki party kiba wan ban khroh ïa u hynrei kum ki nongmihkhmat paidbah um lah ban shu ong beit em hynrei kadei ban long beit da ka lynti ban ïakren.
