Lada kwah ïa ka jingkylla jied ïa ka AITC ong u ma A. A. Shullai

Jowai, Nohprah 06: U ma A.A Shullai haba ïakren bad ki lad pathai khubor mynta ka sngi ha Jowai ula khot ïa ki paidbah nongthep Vote jong ka jylla “lada ki donkam ïa ka jingkylla ha baroh ki liang ki dei ban phai khmat sha kane ka party All India Trinamool Congress (AICT) namar dei tang kane ka party kaba don jingkyrmen bad kaba ïeng ïaleh pyrshah ïaka jingthombor jong ka sorkar MDA”.
Ïa kane u ma A.A. Shullai ula pynban hadien ba uwei na ki riew rangbah ha ka saiñ hima sima u ma Madonbai Rymbai uba dei ruh u CEM ba rim ka JHADC ula wan shakhmat ban ai jingkyrshah ba pura ïa u ma Shullai ha kane ka kynti kum u kyrtong MLA 2023 na ka 2-Jowai Constituency.
Na ka liang u ma Shullai ula pyntip ba ka jingmih jong u na ka Congress ban leit pynïasoh ïalade sha ka AITC ka long halor ka jingrai lang jong ki nongïalam ka Congress ym da kaba ula shuh leh marwei hi.
Ula pyntip ba ha kane ka 10 tarik u Nohprah (Saitjaiñ) ha ka por 10 baje mynstep kan don ka jingïalang paidbah ha madan Jrisaleiñ bad ha kane ka sngi yn pdiang ïa u kum u Candidate bad pynskhem ïa ka Block Committee Jowai da ka jingwan synran lang jong ki nongïalam ba hakhmat ka AITC, ha ka juh ka por u khot lang ïa baroh ki paid nongkyrshah ban wan sakhi lang ha kane ka sngi
U ma Madonbai Rymbai ula pyntip ba ka don kawei ka Political Party kaba dawa tiket MLA ïa u ban ïakhun ïa ka Election MLA, hynrei lada um lah ban ïakhun da ka jingbynïabeit lang ula rai rangbah ban ai jingkyrshan ïa u ma A.A. Shullai kum u riew shimet.