Lada kuman ka Sorkar India ban ithuh ïa ktien Khasi byrngem ka KAS ban pynlong da ka rally heh ha Shillong

Shillong, Jylliew 07: Ka Dorbar Pyllun kaba shisien shisnem jong ka Khasi Authors’ Society (KAS), ka Seng ki Nongthohkot Khasi ka la long hapoh ka Ïing Dorbar Shnong Jaïaw Shyiap Lumpyllon Shillong.
Ha kane ka dorbar bah la pynlong ïa jingïasyllok bad jingïakren halor ka phang ‘Ka Literashor bad Ka Bishar Bniah, bad hadien kane la pynthymmai ruh ïa ki nongkitkam ka seng na ka bynta ka samoi treikam jong u snem 2025 haduh 2027.
Haba ïadei bad kane hadien ka jingïalang u President bathymmai ka Khasi Authors’ Society u Dr. D.R. L Nonglait haba ïakren bad ki lad pathai khubor u la ïathuh ba ka jingïalang ka la shim ïa ka rai ban buddien ïa ka jingdawa na ka sorkar jylla ban pynrung lang ïa ka Ktien Khasi kum ka ktien sorkar ne official language, nangta ban buddien ïa ka jingdawa na ka Sorkar Pdeng lyngba ka Tnat Kam Pohïing ban pynrung noh ïa ka Ktien Khasi hapoh ka khyrnit ba phra jong ka riti synshar ka Ri India.
Kawei pat ka rai ka long ban pynlong ïa ka National Seminar ha Nongbah Delhi khnang ban pynsngew sha ka Sorkar India ïa ka jingdawa ka seng ban pynrung ïa ka Ktien Khasi ha khyrnit ba phra ka riti synshar ka Ri.
Ka seng ka la rai ruh ban buddien ïa ka jaka ba la ai da ka Tnat Arts and Culture ka Sorkar jylla ïa ka seng hapoh ka compound jong ka Tribal Institute Research Mawlai ha kaba ka jingeh ka jaka kadei 5,200 sq feet hynrei ka kam ban aiti noh ïa ka khyndew sha ka seng kam pat dep haduh mynta kumta la rai ban buddien khnang ban ïoh tei ïa ka ophis treikam jong ka seng.
Ka KAS ka la shim ruh ka rai ban pynmih ïa ka Khasi, khasi English Dictionary kaba heh bha mynta u snem.
Haba ong ba ka KAS ka khlem shongthait ban buddien ban pynrung ïa ka Ktien Khasi hapoh ka khyrnit ba phra, u President ka seng u la ong ba lada ka Sorkar jylla ne ka Sorkar Pdeng ka kuman ïa kine ki jingdawa, na ka liang ka seng kam banse ban pynlong da ki jingïalang paidbah ne ki jingïaid proseshon ba heh ban pynbor bad ban pynurlong ïa kine ki jingdawa.
U President u la ïathuh ruh ba ki jingthoh jingtar jong ka seng halor kane ka jingdawa ki la poi lut sha baroh ki Ministry bapher bapher kum ka Ministry of Home Affairs, ha ka ophis u Myntri Rangbah duh ka ri, hapoh ophis jong ka President jong ka ri India hynrei haduh mynta ym shym la ïoh ïa ka jubab kaba shai bad kane ka pyni ba ka sorkar India kam don ïa ka jingthmu ban pynkylla thymmai ne ban pynbha ïa ka khyrnit kaba 8 bad dei halor kane ka nongrim ba ka KAS ka kwah ban buddien biang ïa kane ka kam.
“Ha ka snem 2003 ba la pynrung ïa katto katne tylli ki ktien thymmai hapoh ka khyrnit kaba 8 hynrei ha kitei ki snem wat lada ka jingdawa ka KAS ka la long kaba jur hynrei namarba ka sorkar jylla kam pat shym mynjur da ka resolution hapoh ka Ïing Dorbar Thaw Aiñ ban pynrung ïa ka ktien Khasi hapoh ka khyrnit kaba 8 kumta ka jingdawa ka dang long beit tang na ka KAS bad ka jingkren jong ki MP hapoh Parliament na ka liang ka sorkar jylla ka la leh suki palat kumta ka sahteng kane ka kam bad mynta ba ka sorkar jylla ha u snem 2018 ka la mynjur da ka Assembly Resolution ban kyrpad ïa ka sorkar India bad na ka liang ka seng ka la buddien bad mynta kam long shuh ban shu sngap nalor ba ka ktien Khasi ka la long kaba kham shakhmat bad lada kim pdiang ïa kane kadei shisha kaba long kum ka jingibeiñ ïa ka ktien jong ngi. Ka sorkar India ka la ai ïa ka jylla hynrei ka khlem ai ïa ka ktien, ngi long ka jylla kaba khlem ka ktien,” bynrap u Dr. D.R. L. Nonglait.