‘Lada kim wan shim ïa kine ki ñiut ngin leit bret ha khmat DC Ophis Jowai’: JSM-WU

Khliehriat Lber 26: Ka Dorbar Shnong Wapung Shnong, ka Jaiñtia Students Movement Wapung Unit bad ka Meghalaya People United Front ki la pynpaw ka jingsngew khia bad pyrshah jur ïa ka jingleh khlemakor ka Jowai Municipal kaba la wan ban bret pathar ïa ki ñuit ha ki jaka kiba dang hap hapoh u pud u sam jong ka shnong Wapung Shnong, East Jaiñtia Hills District.
Na ka liang u Waheh Shnong Wapung Shnong, u ma Kduplang Ryngkhlem, u la ong ba “Ngi dap da ka jingsngewsih bad sngew khia kaba khraw ba ngi lap ïa kine ki ñiut kiba la wan bret pathar na Jowai, West Jaiñtia Hills District, na ka liang ka Doarbar Shnong ngi pyrshah jur ïa kane ka jingleh ka Jowai Municipal kane ka buh jingma ïa ka koit ka khiah jong ngi ki paidbah, ka ktah ïa ka mariang, ïa ki um bam um dih kiba don ha kane ka jaka bad kane ka pynjakhlia ïa ka shnong ka thaw” da ka mynsiem kaba sngew khia, u la krpad bad kyntu jur ïa ka Municpial Board Jowai bad ai por tang hapoh ka shi sngi ar sngi ba ki dei wan wan kit noh ïa kine ki ñiut, ki jakhlia baroh kiba la wan bret pathar hapoh shnong Wapung Shnong bad u la byrngem ruh ba lada ka Jowai Municipal Board kam wan ban kit ne shim noh ïa kine ki ñiut, na ka liang ka shnong kan pynlong da ka jingmih paidbah bad kin sa leit ban kit bad bret ïa kine ki ñiut ha ki jaka jong ki hi ha Jowai
“Namar kane ka paw ba phi khlem kheiñ snep satia ïa kane ka shnong ka thaw jong ngi bad kum ka shnong hi ngim ailad da lei lei ruh ban shu wan bret pathar kumne, ki jaka jong ngi kim dei ki jaka bret ñuit ngi pyrshah ïa kane ka jingleh” u la bynrap.
Kumjuh ruh na ka liang u President JSM Wapung Unit, u samla Eiladmiki Dkhar, u la ong ba kane ka dei ka jingleh donbor ka Jowai Municipal Board bad ong ba kane ka long kum ka jingleh beiñ ka shah i beiñ bad dawa ruh ba ki nongtrei ka Municipal Jowai ki dei ban wan ban pynkhuid noh mardor ïa kine ki ñuit bad ym dei satia ban shu wan bret pathar sha ki shnong briew bad byrngem ruh ba lada kim wan ban shim bad pynkhuid ïa kine ki ñiut na ka laing ka seng ruh kan sa rah da ki pick up bad leit bret ïa kine ki ñiut ha khmat ka ophis u Deputy Commissioner Jowai, West Jaintia Hills District.
“Na ka liang ka Meghalaya People United Front Wapung Unit ngi tip bad tikna lyngba ki sakhi sabut ba kine ki ñiut ki dei kiba wan bret na Jowai bad ki la pynmih ïa ka jingsam iewtung kaba lah ban ktah ïa ka koit ka khiah jong ki paidbah” pynpaw u Prsident MPUF-WU, u samla Kynmaw Phawa bad kynnoh ruh ba kane baroh ka dei ka jingbakla ka Jowai Municipal Board kaba khlem da pan jingbit na ka shnong na ka elaka, kumta ka seng ka pyrshah jur ïa kane ka jingleh ka Municipal Board bad dawa ruh ba ka dei ban wan shim noh mardor ïa kine ki ñiut bad lada kim leh kumba la dawa ka seng kan iaid sha khmat da kaba tyngeh.