Lada kim burom ïa ka aiñ khang syndon ïa ki trok kit Coke ban ïaid na jingkieng Umpung : HNYF

Mawkyrwat, ‘Nailur, 23: Ka Hynñiewtrep National Youth Front (HNYF) jong ka Southern Border Area ka la leit ban ïa kynduh ïa u Executive Engineer (EE) jong ka Mawsynram Division, PWD Roads, ban pan jingpynshai halor ka jinglong jingman jong ka jingkieng Umpung kaba don ha surok Balat sha Mawsynram.
Katkum ka jingpynshai kaba la ïoh na u Executive Engineer ka jingkieng Umpung ka la palat por haduh ba la shna ïa ka bad mynta ka la tlot bha. Nalorkata ruh, ki bor District Administration ki la pynjari da ka hukum 163 BNSS ban khang ïa kino kino ki kali kiba kit palat pud ïa ka 9 ton ban ïaid lyngba katei ka jingkieng.
Hynrei, ha ka jinglap jong ka HNYF, ki trok kit coke ki la shu pynkheiñ ïa kane ka jingpynjari da kaba ïaid lyngba katei ka jingkieng kaba la kham tlot, kaba la ktah jur ruh ïa ka jingjot bad sniew jong ka surok haduh ba ka leit ka wan jong ki paidbah ruh ka la pynjynjar shisha. Kane ka ktah eh khamtam ïa ki kali kamai, ki kali shimet bad ïa ki paidbah nongleit nongwan.
Ka HNYF ka la shim ïa ka rai ban khang syndon ïa ki trok kit coke ban ïaid ne ban ïeng lyngba ka jingkieng Umpung. Ka seng ka ai khubor ruh sha ki trai kali kit coke ba kin sngewthuh bad bud ryntih ïa kane ka jingpynbna khnang ban lait na kino kino ki jingjia ba sngewsih ha ka la shai la shi sngi bad ym tangkata, ka HNYF ka ai ruh ka jingkyrshan ban ryngkat bad ki paidbah bad lada ki trok kit coke ki ïaleh pyrshah ïa ka jingmaham jong ka seng khamtam ïa ka jingsngew jong ki paidbah lada jia kano kano, ka seng kan nym don jingkitkhlieh.