Lada ki samla Khasi ki kiew ym donkam shuh ïa kiba nabar ban trei shane, ong i kong Silbi

Shillong, Risaw 13: “Kane kan dei ka sngi sah kynmaw ïa ki khynnah pule ba kumno kin ïaid ha ka jingim jong ki bad nga ai khublei kyrpang ïa i kong Careen E G Marbaniang Assistant Teacher ka Mawkhar Christian Higher Secondary School iba la ïoh ïa ka State Award 2024 kum ka dak ka jingithuh ïa ki kam shakri, ka jingaiti halor ki kam pule puthi,” ong i kong Silbi Passah, Padma Shri Award iba la long kum i kongsan ha ka jingpynkup burom ka Seng Kynthei Mawkhar Welfare Organisation ïa ki samla kiba pass bha ha ki jingpule, nangta ha ki kam ïalehkai bad kumjuh ruh ïa i Dr, Careen.
I la ong ba ka seng kynthei ka la trei shitom bad pynlut ka por ban kyntiew ha baroh ki liang ban wad ïa ki kam pynroi. “U Williamson Sangma 22.02.1975 la ithuh ïa ki seng longkmie na ka bynta ka bha ka miat ka imlang sahlang. Haba phai sha ka jingïoh khusnam ka dei ka ban ïarap ban kyntiew ïa ki, lada ki jingeh ki wan ha ki jingpule dei ban shim ïa ki bad bteng ban minot, bad lada phi biang ka jingstad kan long ka lad ban aireng ïa kiwei pat ki jaitbynriew. Lada lah biang nalade ym donkam shuh ïa kiwei ki jaitbynriew ban wan sha kane ka jylla ban trei naba lah biang hi ki briew napoh jylla, kumta dei ban im tip briew tip Blei, burom ïa kiwei, ïaid shaphrang da ka jingtip sngi ban burom ruh ïa ki kmie ki kpa bad kiba halor naduh ki nonghikai,” ong i kong Silbi Passah.
Katba i President ka seng kynthei Mawkhar i kong S N War i la ong ba ka seng kynthei ka la pawnam ha kylleng ki jaka halor ki kam babha ba la leh ha kiba bun ki liang. I la ïathuh ba ha u snem 2004 ka dei ka snem ban sah jingkynmaw ba ki kynthei ka shnong ki la pynlong ka jingïakynduh ha kaba la seng ïa kane ka seng kynthei. Hapoh ka seng ki longkmie baroh kidei ki dkhot bad ka don ruh la ki jong ki EC member. Kane ka EC ka la trei borbah ki kam ba ratbah ba ka la leh, kum ka jingpynduh ïa ka kiad, kiba ïeng bad dih kiad ha surok. ka seng ka ju leit pahara ha shnong, ka ïarap ïa ki longïing kiba duk kiba kyrduh.
“Ha ka 2005 kane ka seng ka la register ïalade hapoh ka society ha ka 22.11.2005 bad la ïoh ka jingithuh. Ka la don la ki kyndon bad ka la ai jingmyntoi shibun ïa ka seng. Ki longkmie na ka bynta ka jingbha ka seng ki shait ïatreilang ha kiba bun ki liang la ka long ha ka sngewsih ne sngewbha. Ka seng ka kynthup ïa ki longkmie kiba stad kiba tbit ban pynïaid ïa ki kam. Ban pynmih pisa ka pynlong ïa ki carnival, fate, food fest bad kiwei kiwei kum ka jingdonkam ban pynlut ha kum kine ki prokram pynkupburom. Ka seng ka la pynmih ïa ka skul Lasara bad ka siew tulop na ka seng lyngba ka jingïarap ka dorbar shnong. Ka ju leit ai jingïarap ïa kito ki longïing kiba pang ba shitom bad ka seng ka wanrah ïa ka jingïatylli ki longkmie ha ka shnong bad ka dorbar shnong hi baroh kawei,” ong i kong War.
Katba na ka liang u Assistant Rangbah Shnong ka Dorbar Shnong Mawkhar u Bah Ransom Sutnga ha ka jingkren u la pynpaw ïa ka jingsngewkmen ba ka shnong ka don ïa i DC napoh ka shnong ba dei ruh i dkhot ka Seng kynthei. “Watla ki duna kiba wan napoh ka EC member ka shnong ha kane ka prokram, na ka seng samla bad kiwei, hynrei ka Dorbar shnong hi kan ym ieh ïa ka seng kynthei jong ka shnong. Nga kynmaw ba ha u snem 1979 ha ka por ba nga dang shong class 3, ka skul ka ju ai ki award ïa ki khynnah pule hapoh ka Upper Primary, ka Lower Primary bad ha kane ka jingai khusnam baroh shi shnong ki ïa mih bad kane ka ai mynsiem ïa ngi kiba ïoh khusnam, bad dei da kane ka jingai mynsiem kaba nga la ïoh ban leit pule engineering namar kadei ha kato ka Sngi ba ïoh ka jingpynshlur. U nongpule ba nyngkong eh ba rung hapoh IIM dei na shnong Mawkhar namar ba la pynshlur lyngba ka jingai khusnam. Nga kmen shibun eh ba ka seng kynthei ka pynlong ïa kane ka jingai khusnam naba kane kan pynshlur ïa khynnah pule, bad kumjuh ruh kiba smat ha ki kam ïalehkai. Aiba kane ka khusnam kan ai mynsiem ruh ïa kiwei ki khynnah na kiwei ki shnong ba kin lah ban lehbha ïa ki jingpule jong ki,” ong u Assistant Rangbah shnong.
Na ka liang i Dr. Careen E G Marbaniang ha ka jingkren ila ai mynsiem ïa ki khynnah pule ba kin long kiba trei shitom bad ba kin pdiang ïa ki jingpynthymmai ki ban sa wanrah da ka sorkar khnang ba ka jylla kan ym sahdien.
Ha kane ka sngi ka Seng Kynthei ka sam khusnam ïa 5 ngut ki samla pule kiba la pass bha, ba kynthup ïa uwei uba la ïoh Gold Medalist ha ka 30th Inter School Karate Tournament 2024 ba la pynlong da ka AMKA u Samla Nathaniel Jasper.
Katba kiwei pat ki dei ka samla Celina E Diengdoh 1st Division 90% tam ha ka Msc Clinical Psychology na ka Assam Down Town University, ka Samla Jolene V Diengdoh 1st Division 77% shaneng ha ka BA Examination Polsc na NEHU, u Samla Ebenezer A Lyngdoh 1st Division 82% shaneng ha ka ICSE Clas X, ka Samla Ashley M Lyngdoh 1st Division 75% shaneng ha ka ICSE class X, u Samla Pynmanbha Syiemïong ba ïoh 1st Division 87% MBOSE Science stream, u Samla Aimebankiew Tariang 1st Division 87% shaneng ha ka MBOSE Class XII Arts Stream bad ïa i Dr. Careen E G Marbaniang i nonghikai iba la ïoh ka State Award.
La pynïaid ïa ka jingïalang da i kong M Nongrum, la ai jingrwai da u samla Haniel War bad la ai khublei da i secretary kong H D Lymba bad la pynbyrnia ïa kane ka sngi da i Aida C War, bad ha kane ka sngi na ka liang Deputy Commissioner ka East Khasi Hills i kong R M Kurbah i la ïarap sam khusnam sha u Bah Kyrshan Kharnaïor bad Emon kiba ju ïarap bha ïa ka seng Kynthei ka Shnong.