Lada ki paidbah ki mynjur kam don jingeh ïa ka sorkar ban wanrah lynti rel : Sniawbhalang

Shillong, Risaw 10: U Symbud Myntri Rangbah ka jylla uba khmih ïa ka tnat ka Kit ka Bah (Transport) u Bah Sniawbhalang Dhar u la ong ba ka sorkar jylla kan sa ïakren halor ka projek lynti rel tang hadien ba la dep ban lum ka jingïalang jong baroh ki nongshong shnong ban shim ïa ka rai halor kane ka kam bad lada ki paidbah ki mynjur kam don jingeh ïa ka sorkar ban wanrah lynti rel.
Haba jubab ïa ka jingkylli halor ka jingdawa ïa ka rel kit marbam ne kit tiar, u Bah Dhar u la ong, “Phi ïohi ngi don hangne na ka bynta ki paidbah. Lada ki paidbah ki mynjur kam don jingeh satia na ka bynta jong ngi.”
Ha kawei ka liang, u la banjur da kaba ong ba kano kano ka rai halor kane ka kam ka donkam ka jingïamynjur bad ïamonlang baroh.
“Hynrei phi ïohi, kum ka rel kit mar bad ka rel, ngi hap ban ïoh ka jingmynjur lang jong baroh bad kumta kum ka sorkar ngin sa shim ïa ka rai,” u la bynrap.
U Symbud Myntri Rangbah u la kren da kaba shai ba ka rai kan ym don u pud u sam tang ïa kano kano ka thaiñ hynrei ka donkam ka jingmynjur na baroh ki thaiñ.
“Ym don nong Jaiñtia, ne Khasi (region), kino kino kiba la long kiba la khreh ngin sa shim ka rai,” u la ong da kaba banjur ïa ka jingdonkam ka jingïakren kaba long kawei halor kum kine ki project.