Mawkyrwat, ‘Nailur 11: Ka HNYF Southern Border Area ryngkat kiwei de ki seng mynta ka sngi ki la pynlong ka jingïalang ban dawa ruh na ka sorkar ba dei ban pynkylla noh sha ka Intermediate ïa ka surok na Weiloi shaduh Umpung – Ranikor ha ïew Mawsynram, East Khasi Hills District.
Kiwei de ki seng kiba la donlang ha kane ka jingïalang ban kyrshan ïa kane ka mat jingdawa ki long ka FKJGP, HYC, ka Mawsynram Tourist Taxi Association (MTTA), ka Meghalaya Commercial Truck Owners & Driver Association (MCTO&DA) bad ki Rangbah shnong jong ka thaiñ Mawsynram baroh kawei.
Lah ban kdew ba kane ka jingïalang ka dei halor ka jingdawa ban shna pynbha bad pynheh ïa ka surok Weiloi shaduh Balat – Ranikor namar ka jingdonkam katkum ka jingïaid jong ka por bad ym tang kata ka long ruh ka surok kaba lah sniew palat liam bad 50 tylli ki snem naduh ka sorkar Assam kan neh kumjuh.
Haba kren ha ka jingïalang, u President jong ka HNYF Southern Border Area, bah Kyllang Thongni u la ong ba na ka liang jong ki kim kwah shuh tang ki jingkular hynrei ki kwah ban ïohi noh ïa ka jingthoh ne kata ka Work Order na ka sorkar Meghalaya lyngba ka tnad PWD (Roads) ba kin pyntreikam noh mardor ïa ka surok kaba dei ïaid na Weiloi, Balat sha Ranikor da kaba pyntrei ym da ka Single Lane hynrei da ka Intermediate Lane.
U la ong shuh shuh ba lada ka sorkar ka dang sngap mynthi ïa kine ki jingdawa jong ki sengbhalang, ki la rai ba nangne shakhmat kin sa shim da kiwei pat ki shynjam ki jingïakhih ba kham tyngeh da kaba kan poi ka por ba kin pynlong ruh wat ki jingpakhang surok ba ym shah shuh ban ïaid kali ne ban kit wat tang ïa ki marbam ha kane ka thaiñ. Ymtang kata da kaba kin pynlong ruh ka jingïabam khana paidbah hapdeng surok kum shibynta jong ka jingïakhih haduh ba kin da ïoh ïa u soh jong ka jingdawa da kaba ap kyrmen ïa ka surok ba bha bad wat kin hap ban thiah paidbah ha surok.
Katba na ka liang u bah M. Marngar uba dei u President jong ka ka Meghalaya Commercial Truck Owners & Driver Association (MCTO&DA) ha ka jingkren jong u, u la ong ba na ka liang ka kynhun ïa kum kane ka mat jingdawa ka ai ka jingkyrshan ba pura namar ba ki sngewthuh shai ba haba sniew ka surok ne ki lynti ki synkien, ki marbam ruh ki kiew dor. Shuh shuh u la bynrap ruh da kaba ong ba ka Mawsynram hi ka la dei kawei na ki shnong ba jur tam u slap ha ka pyrthei ba ki ri jong ka pyrthei ki tip ïa kata, hynrei kaba sngewsih ka long ïoh ba na ka nam ba jur tam u slap ha ka pyrthei kan ïoh sa kawei pat ka nam ba ka Mawsynram ka dei jaka ba don ïa ki surok kiba sniew tam ha ka jylla bad ha ka pyrthei, la pynpaw u bah Marngar.
Ki nongkren ha kane ka sngi ki long u bah Kistoles Marbaniang, Sordar Shnong Raid Sawsymper, bad la pynïaid ïa ka jingïalang da u bah Drimshon Mawlein, Secretary jong ka HNYF Southern Border Area.
