Nongstoiñ, Ïaïong 07: Namar ka jingkhynñait jubor jong ka sorkar ïa ki bun tylli ki shnong ha ka thaiñ Malangkona, kiba dang hapoh u pud u sam jong ka hima Nonglang Sirdarship sha ka jylla Assam, ki paitbah bad ki nongsynshar shnong ki la pynpaw ïa ka jingbitar kaba jur, da kaba ong ba katei ka jingleh jong ka sorkar, ka lah ban wanrah shibun ki jingeh bad ka lah ban wan rah ruh ïa ka jingsngew ïapher jaitbynriew hapdeng ki Rabha bad ki Garo kiba shong ha katei ka thaiñ.
U bah Sarkhar Riangtem uwei na ki riew rangbah na ka shnong Joypur kaba dang hap ha ka Malangkona area, u la ong ba katto katne sngi hadien ba ki ar ngut ki Myntri Rangbah kata u Conrad Kongal Sangma bad u Himanta Biswa Sarma, ki la dep ban ïasoi ïa ka soskular pynbeit pud ha Delhi, ki dak ki shin ki la sdang ban paw namar ba ki pulit ka Assam bad ki briew jong ka tnad khlaw, kim shah shuh ïa ki paitbah nongshong shnong ka thaiñ Malangkona ban khat shyiap na kawei ka wah kaba don ha pdeng shnong.
Nalor kata u la ong ruh ba ka jingïaleit ïa wan na ki shnong kiba hap hapoh Merghalaya bad ki ba hap ha Assam, kam long shuh kumba ju long hynrei ka la don ka jingshah pyndik ba bun rukom. Ha kajuh ka por u la ong ba ka leit ka wan kam shngaiñ shuh khamtam ha ka por mynmiet bad wat tang ban leit siew leit tda na ïew Joypur kaba ki khot mynta ka ïew gamarimura, kam long shuh kumba ju long ha ki por ba la dep.
U bah Riangtem u la ong ruh ba ka sorkar kam tip satia hangno ka don ka shnong Joypur, namar kam shym la twad jingmut bniah na ki nongsynshar hima bad ki nongsynshar shnong. U la ong ruh ba ka shnong Joypur ka don ar kyntoit kaba shaphang Assam ka dei kaba la shong la sah da ki jaitbynriew Rabha, katba kaba shaphang West Khasi Hills pat ka dei kaba la shong la sah da ki Jaitbynriew Garo la da ki spah snem. U la ong ba lada bishar bniah katkum ki kot ki sla bad ki dulir kiba naduh ka por ba ka sorkar phareng ka la aiti ïa ka jingsynshar ha ki hima, ka ïew Joypur ruh ka dang hap ha Meghalaya.
Ha kajuh ka por u la ong ba watla katta ruh na ka bynta ban wanrah ïa ka shong suk shong saiñ hapdeng ki Rabha bad ki Garo, ki nongsynshar ka hima Nonglang Sirdarship ryngkat ki nongsynshar jong katei ka thaiñ, kim kwah ban klun ïa ki jaka ba la shong la sah da ki Jaitbynriew Rabha, ha kaba ki la ïa pynbeit ba ka bynta jong ka shnong Joypur kaba la shong la sah da ki Rabha kan leit noh sha ka Assam. Katba ka bynta ba la shong la sah da ki Jaitbynriew pat kan sah beit ha Meghalaya bad u pud u sam u dei beit na ka Culvert kaba don ha khmat ka ïew Joypur sha phang Malangkona.
U la ong ruh ba utei u pud u sam ba ka hima Nonglang Sirdarship kam kwah ban khynñiat sha Assam, ka long na katei ka culvert shaphang mihngi ter ter haduh Upper Gizang Reserve Forest. Katba ïa ka Lower Gizang pat yn khynñiat noh sha Assam. U la ong ba lada ka sorkar kam kohnguh ïa katei ka jingkwah jong ki paitbah, kim banse ban leit ujor da ka mokotduma shaduh Supreme Court.
