Lada ka Sorkar ka shah jem ngim banse ban ïaid da kiwei ki lynti: Oscar Kharmuti

Nongstoiñ, Nailur, 13: Ka jingwan jurip jong ki heh sorkar ka Assam ha ka 10 tarik mynta u bnai ïa ki shnong ha ka thaiñ Langpih, ba la ïalam da ka Nandita Das ka MLA jong ka Boko, ha kaba la synran lang ruh da kiwei pat ki para MLA jong ka Congress, kiba don ha ka liang pyrshah, ka la pynkyndit bad pynlyngngoh ïa ki Khasi kiba dei ki nongshong shnong katei ka thaiñ.
Nalor kata kaba kham pynlyngngoh shuh shuh ka long ba ha katei ka sngi, ki la pynlong ruh ïa ka jingïalang bad ki Nepali kiba shong ba sah ha Langpih. Kumta halor katei ka jingwan jurip jong kitei ki heh ka sorkar Assam, mynta ka sngi 13 tarik ki nongïalam ka Federation of Khasi Jaiñtia and Garo People West Khasi Hills, ki la leit ban buh da ka dorkhas ha u bah Garod L.S.N Dykes Deputy Commissioner (IAS) ka West Khasi Hills, ba un shimkhia ha ka ban ïakren bad ki bor sorkar ha kaba ïadei bad katei ka bynta.
U bah Carry Oscar Kharmuti General Secretary ka seng, haba ïakren bad ki lad pathai khubor hadien ba ki la mih na kamra treikam jong u DC, u la ong ba ha kaba ïadei bad katei jingwan jong ki heh ka sorkar Assam ha Langpih ha katei ka sngi, ka pyni ba ka sorkar Assam kam burom satia ïa ka jingong jong u Himanta Bswa Sarma bad u Conrad Kongal Sangma, ha ka jingïakynduh lang jong ki ha Langpih ha ka 16 tarik Naiwieng jong u snem ba la dep.
U la ong ruh ba katei ka jingwan jurip jong ki heh ka sorkar Assam ïa ki shnong ha ka thaiñ Langpih, ka pyni shai ba kam burom satia ïa ka status quo kiba ki ar sorkar ki la ïa mynjur. U la ong ruh ba na ka liang u DC u la ong ba kitei ki heh ka sorkar Assam, kim shym la pyntip satia sha u shuwa ba kin wan hynrei u la shu ïohi lyngba ki lad pathai khubor.
Kumta ha kaba ïadei bad ka dorkhas ba ka seng ka la aiti ha u, u la ong ba un sa phah sha ka Regional Committee on Border Dispute West Khasi Hills. Nalor kata ïa kino kino ki jingthoh kiba wan na kiwei pat ki kynhun, ki dorbar shnong bad ki riew shimet kiba ïadei bad ki kam khappud kiba wan ha ka miej jong u, un phah beit sha ka Regional Committee ba kin peit bad bishar bniah.
Utei u nongïalam ka seng u la ong ruh ba ka jingwan mushlia jong ki heh ka sorkar Assam man la ka por, ka pynshrai bad ka pyningkhong ïa ka seng ha ka jylla baroh kawei, khamtam lei lei ba ki heh ka Assam ki ong ba kin ym shah ba ka Meghalaya kan shim wat tang shi inshi na ka khyndew, kaba ki la kam kaba mut naduh Kampahduli haduh Mawsikar. Katei ka jingong ka la pyn bitar bad pynsat sia ym tang ïa ka seng hynrei ïa ki paitbah ka jylla baroh kawei.
Nalor kata u la ong ba lada ka Assam ka kop bad ka nud ban kren kumtei, na ka liang ka seng ka ong ba kan ym ailad ba ka Assam kan wan kam wat tang shiteng inshi ka khyndew jong ka Meghalaya bad lada ka leh tam ïa kata ka seng kam banse ban ïaid da kiwei pat ki lynti.
U la kyntu ïa ka sorkar ba kam dei ban shu sngap ne ban shah jem, namar lada ka sorkar ka shah jem ka Assam kan nang tur ban nang knieh shuh shuh ïa kiwei pat ki jaka. Lada kan jia kumne man ka por, ka seng kan ym lah ban shu sngap jar, hynrei ka hap ban shim da kiwei pat ki lad kumno ban ïada ïa la ka khyndew ka shyiap.