Shillong, ïaïong, 29: Ka Hynñiewtrep National Youth Front (HNYF) East Khasi Hills District ha ka sngi Thohdieng ka la byrngem ba lada ka Sorkar Meghalaya Democratic Alliance (MDA) ka ai jaka ïa ki briew kiba sah ha Them Iew Mawlong, ka seng kan tur beit da ka bor sha kane ka jaka.
Dang shen ki nongïalam jong ka Harijan Panchayat Committee (HPC) ki la dawa ïa ka Sorkar ban ai jaka ei mar 200 sq.meter bad ban mang pisa ruh T.20 lak na ka bynta ban pynshna iing ha European Ward ïa ki 342 tylli ki longing kiba sah ha Them Iew Mawlong.
“Ki dei eh kiei kita ki Harijan ki ban hukum ma ki ïa ka Sorkar, (hato) kham donbor ma ki, ne kham donbor ka Sorkar,” ong u President ka Seng u Bah Bless Dkhar ha ka jingïakren bad ki lad pathai khubor.
“Lada ka Sorkar ka ïaid shakhmat halor kane ka ishu ban ai jaka ïa ki (Harijan), ngi ruh ngim banse ban tur beit sha Them Metor, ngin pyrshah beit. Kata ka dei kaba ngi la pynkhreh bad ngin peit kaei kaba ka Sorkar kan leh,” u la ong.
“Balei ki mih kita (ki longing) haduh 300 tam bad katkum ka jingtip tang ha Shillong Municipal Board ki nongtrei ki don tang 128 ngut bad kiwei kiwei ki tnat treikam ngim lah ban tip hynrei ka Sorkar ka dei ban pyntreikam da ka Service Rules namarba ki dei ki shakri Sorkar ki dei ban leit sah ha ki Quarter (ba la pynkhreh da ka Sorkar bad kim donhok ba kin ong ma ki, ba kin sahduh hangne. Ki dei eh kiei ma ki. Lada ki dei tang ki shakri sorkar ynda la shongthait ki dei ban leit sha shnong lajong. Ka Seng kan ym shah daleilei ruh em,” u la ong.
“Balei ka Sorkar ka buh slem ïa ki ha katei ka jaka. Ka jingailad jong ka Sorkar ban pynslem ïa kane ka kam, ka pynlong ïa ki ban dang ïohbor. Ka Seng kan ym shah, bad horkit hordang lada poi sha katba poi ruh kam pher,” u la bynrap.
Haba pynpaw ba kiba bun ki trai jylla trai muluk kiba shah kyndang ha ka Sorkar haba pyntreikam ïa ki projek kiba heh u la ong, “hato ka Sorkar ka ju burom? Hynrei ka Sorkar jong ngi ka kyndang beit da ka bor. Ka phah da ki Pulit. Ngi la ïohi ïa kaei kaba jia ha ka jingshna ïa ka surok Shillong-Dawki kaba ki trai kim pat sngewthuh wat tang ban ai jaka sha ka Sorkar hynrei ka Sorkar pat ka leh beit da ka bor. Hynrei balei pat ïa ki thie (Harijan). Don aiu? Lada ym lah ban weng ïa ki (Harijan) dei ban hiar shuki.”
“Lada ki (Harijan) pynheh ka Sorkar ka dei ban beh kam shisyndon ïa ki,” la ong u Bah Dkhar., da kaba bynrap ba lada ka Sorkar ka ai jaka ïa ki, ka Sorkar ka la pynkheiñ ïa ka Meghalaya Land Transfer Act
U la kynnoh ruh ba ka jingkyntait jong ki jaidbynriew Harijan ban mih na Them Iewmawlong ka dei namarba ba ki ïohlad ban leh laitluid ïa ka khaii ka pateng.
Ka KSU, ka FKJGP ha kine ki khyndiat sngi ki la mih shakhmat ban pyrshah ïa kane ka jingdawa jaka bad pynshna ing ei jong ka Harijan Panchayat Committee ïa ki briew kiba sah ha Them Iew Mawlong.
