Lada ka Sorkar Jylla ka don mon ka lah ban kyntiew ïa ka bainong; ong ki nongshet ja sngi

Jowai, Jylliew 12: Ki nongshet ja sngi hapoh ka lama jong ka ‘All Jaiñtia Mid Day Meal Worker Union’ ha kane ka sngi Saitjait kila lum biang ïa ka jingïalang ha Dorbar Hall jong ka Dulong Jowai, ban ïakren ha kaba ïadei bad ba jingeh kiba ïa kynduh naba ka sorkar haduh mynta kam pat shem la sngap ïa ka jingdawa.
Kitei ki nongshet ja sngi kiba la wan na East Khasi Hills ruh kila pynrem jur ïaka jingkren jong u myntri sorkar jong ka jylla u ma Kyrmen Shylla (MLA), ula la pyntip ba ka sorkar kam don pisa ban siaw ïa ka bai nong bad kane kala pyndiaw shisha ïa ki kum ki nongshet ja sngi kiba don ha kylleng ki skul ka jylla.
Kawei na ki longkmie ka kong Lamjingieit Lapasam kaba dei ruh ka General Secretary All Jaiñtia Mid Day Meal Worker Union Laskeiñ C& RD Block kala pynsngew kum ki kynthei kiba peit ïa ka eh ka shon ha ïing ha sem ban pyndap pynbiang ïa ka bam ka dih. Kala ong tang ha ka dor kaba 1000 tyngka ym shem la lah ban pyndap pynbiang ïa ka ïing ka sem bad ka sorkar kala dei ban kyrshan lem ïa kane ka jingdawa ban kyntiew ïa ka bai noh na ka 1000 tyngka sha ka 5000 tyngka bad kumjuh ïa ka naka 10 bnai sha ka 12 bnai ha ka shisnem.
Na ka liang u ma Khroo. L. Pariang kum u nongaibuit jong ki nongshet ja sngi ha ka jylla, ula pynrem jur ïa katei ka jingkren u MLA ma Kyrmen Shylla, ula ong kum u Myntri ba dei peit ïa ka tnad Social Welfare ka jylla um dei satia ban pynmih ïa kitei ki kyntien namar u khlem peit ïa ka tnad pule puthi bad ka pla tyngka ka sorkar jylla.
Da kaba pynshai shuh shuh u ma Pariat ula ïathuh ba ka sorkar jylla kala ai tang 100 tyngka ha ka sngi bnai, katba 900 tyngka la siew na ka Ministry ka tnad pule puhi jong ka Mid Day Meal scheme ka sorkar kmie kaba long baroh 1000 tyngka.
Halor katei ka jingkren u Myntri na ka liang ki nongshet ja sngi hapoh ka jylla kim lah satia ban pdiang, la ong u ma Pariat bad ka long pynban kaba pynsngewsih ïa ki nongshet ja, ha ka jaka ba un kren ïa ka bha ka miat jong ki nongshet ja sngi ula pynmih pynbna kum kitei ki kyntien.
Ula ong ‘lada ka sorkar jylla ka don ka mon ki lah ban pynkiew ïa katei ka bainong jong ki nongshet ja sngi ha baroh kawei ka jylla’ ha ryngkat ka jingïatreilang naduh u Myntri rangbah ban u myntri ka pule puthi.