Lada ka NPP ka kiew 20 ngut ki MDC ruh kan ym knieh jingsynshar na ka UDP ha KHADC : Dy CM

Shillong Lber 27 : Hadien ba kiba bun ki MDC jongka Congress ha Khasi Hills Autonomous District Council (KHADC) ki la nang pynïasoh sha ka National Peoples’ Party (NPP) hynrei na ka liang u Symbud Myntri Rangbah ( Deputy Chief Minister) ka jylla u bah Prestone Tynsong u la ong ba kum ka Party kaba don la ka nongrim kan bat beit ïa ka soskular kata ba wat la ki MDC jongka NPP kin poi 16, 17, 18 19 ne haduh 20 ngut ruh ka party hi kan ym knieh ïa ka jingsynshar na ka United Democratic Party (UDP) bad kane ka United Democratic Alliance (UDA) kan neh beit haduh kaba kut ka samoi san snem.
Halor ka jingkylli hato ka NPP ka don ne em ka jingthmu ban shimti hi noh ïa ka jingsynshar ha lade ha KHADC, u Symbud Myntri Rangbah ula ong “ Ngan pynshai kdar ïa phi ba ka NPP ka dei ka Party kaba ïeng ha ka nongrim bad kaba bat la ka soskular ne jubanlak ba ka la khlei kata ka long ba lada ki MDC jong ngi (NPP) ki poi 16, 17,18,19 ne 20 ruh ngin ym knieh ïa ka jingsynshar ha KHADC, ka UDP kan ïalam ïa ka UDA bad kane ka Executive Committee (EC) kan neh haduh ba kut ka san snem”.
U bah Prestone ula ong ïa kane hadien ba lamih ki jingpynsaphriang khubor ba ka NPP kan sa knieh noh ïa ka jingsynshar ha KHADC na ka UDP namar ba ka la nang bun paid bun paid mynta da ka jingnang wan pynïasoh ki MDC ka Congress sha ka. Barobor ha kano kano ka jingsynshar haba ka party ka la bun paid ka ïalam beit ïa ka jingsynshar hynrei u bah Prestone ula ong kum ka party kaba ïeng haka nongrim kan ym knieh da lei lei ruh ïa ka jingsynshar na ka UDP.
“ Ngin bat la ka kular kuba la khlei naduh ka sngi ba sdang ban thaw ïa ka UDP namar ngim kwah ban shet kylla ïa ki paralok tang shiteng por. Kumba la ïa pynbeit naduh kaba sdang kumta ngin bat skhem ïa kata bad ngi kwah ba kane ka EC ba mynta kan neh ka jingsynshar haduh kaba kut ka samoi 5 snem” ong u bah Prestone.
Kumba long mynta ka NPP ka la don 11 ngut ki MDC na ka jingdon ki dkhot ba 30 ngut hapoh ka ïing Dorbar KHADC. Hynrei sa arngut ki dang pynkhreh ban pynïasoh bad ka NPP kita ki long u MDC ka Rambrai u bah Bajop Pyngrope bad u MDC ka Mairang u bah Batskhem Ryntathiang. Hynrei nalor kine ruh kin dang don bun ki ban pynïasoh sha ka NPP shwa ka election MLA 2023.