Lada jia ba hap wan phet ki paid Khasi bad Garo na Bangladesh ngi donkam ban ïarap para ma ngi ong u Myntri

Shillong, Nailar 6 : Lada jia ba ki paid Khasi, Jaintia bad Garo ki hap ban phet rieh na la ki jaka sah jongki na Bangladesh bad wan phet sha kane ka jylla Meghalaya hato kam dei ka kamram kum ki para briew ban ïarap ïa ki? kylli u myntri ka tnad pule puthi u Rakkam A Sangma.
U la ong “ ïa kane ngin leh da ka jingïasngew para briew ym da ka jingsngew niam. Nga kren lypa ïa kane namar kiba bun bah ki paid Khasi-Pnar bad Garo kiba sah ha Bangladesh ki mad ïa ka jingeh mynta na ka jingïakhih kaba jur ha ka ri Bangladesh”.
“ Ngim lah ban tip kaei ka ban jia lashai, lehse baroh ki paid Khasi, Pnar bad Garo kiba sah ha Bangladesh ki mad ïa knao kano ka jingjia khlem pep kin wan phet rieh sha kane ka ri bad jylla jongngi bad nga tharai ngi la dei ban pyrkhat lypa la ngin ïarap ïa ki kum ki para briew para jait para kynja ne ngin kyntait ïa ki da kaba ïeh beit ha ka rai ka sosrkar pdeng?” kylli u Myntri.
U la ong “Kum ki para briew ngim dei ban don ka jingsngewïapher niam, ki don bun ki paid Khasi, Pnar bad Garo kiba dei ki Khristan bad Hindu ruh kumta ngim dei ban don kata ka jingsngew ïapher niam. Ki dei ki para jait para kynja bad ki paid riewlum hi kumta ngi dei ban don ka jingsngew para briew. U la ong kata ka jingsngew ïajan para jaidbynriew ruh kan don beit kumta ym dei ban buh ïa ka niam hakhmat haba ïadei na kajuh ka thymmei”.
U la ong ruh “Kane ka jingjia mynta ha Bangladesh khlem pep kan ktah beit ïa ki briew jong ngi kiba don hapoh ka ri Bangladesh kumta ngi dei ban long kiba la pynkhreh lypa naduh ka sorkar jylla, sorkar pdeng bad ki riew paidbah kaei kaba ngi dei ban leh lada wan phet ki para jait para kynja sha kane ka jylla”.