Lada jia ba dang rang tyrkhong sa 100 sngi yn hap thied bording ka sorkar 300 klur tyngka

Shillong, Jylliew 06 : U Myntri Rangbah ka Jylla Conrad K Sangma mynta ka sngi Ba-ar, ula ong ba ka Sorkar Jylla kan hap ban pynlut sa T. 300 klur ka pisa ban thied ïa ka bording lada dang bteng ka jingtyrkhong slap ha kine ki 100 sngi ban wan.
Haba ïakren bad ki nongthoh khubor, u Myntri Rangbah ula ong ba lada kheiñ ïa ka jingpynlut kyllum lang ha kine ki arsnem ba la leit noh, ka Sorkar ka la hap ban pynlut kumba T. 600 klur na ka ïarong tygng ban siew ïa ki jingsiew bapher bapher kynthup ka jingthied ïa ka bording ban lah pynneh ïa ka jingai bording ba ngi ïoh mynta.
“Ngi la thied jan kot 3 klur tyngka ka bording man ka sngi wat haduh mynta namar ka jinglong ka suiñbneng ba ngi mad mynta. Namar kata, lada kane ka jinglong jingman ka dang ïai bteng ha kine ki 100 sngi ban wan, ngin hap ban pynlut sa T.300 klur tang ban thied bording, tang ban lah pynneh ha kajuh ka kyrdan ïa ka jingpynlip bording ba treikam mynta” ula ong.
Haba pynpaw ba ka jinglong jingman ka long kaba eh bha, u Myntri Rangbah ula ong “Hynrei ngi la pyrshang kat kaba lah ban pynthikna ba ka jingpynlip bording kan ym ïaid palat ïa kane kaba mynta”.
Haba kren ïa ka jingnang hiar ka um ha Dam Umiam, u Conrad ula ong ba u pud ula jan poi haduh ba hap ban khang dam namar ka Jylla kam shym la ïoh ïa u slap ha kine ki bnai ba la leit noh bad bynrap ba kane ka dei kawei na ki jingeh ha kine ki bnai haba phai sha ka jinghap slap ha ka Jylla.
Haba pynpaw ruh ba ka jingduna bording ka la ktah ruh ïa kiba bun ki bynta jong ka Ri, u Conrad ula ong “Jan baroh ki Jylla kila mad ïa kajuh ka jingeh ba ngi ïakynduh. Kane hi ka dei kumba nga ong, u slap ula ktah ïa baroh bad ka jinglong jingman hi kala sniew ha baroh ki jaka”.
U Myntri Rangbah ula ong ba ka Sorkar jong u, ka la pyrshang kat kaba lah ban leh eiei halor kane ka jinglong jingman bad kyrmen skhem ba u slap un wan hap noh.
Haba ban jur ïa ka jingdonkam ban pynkhlaiñ ïa ki lad ki lynti ban kyntiew ïa ka jingpynmih bording ha ka Jylla, u Conrad ula ong “Ka jingpynmih bording na ka Sngi (Solar Energy) kan dei kawei na ki lynti hynrei kane kan nang shimpor”.
“Hynrei katba ngi dang ïaid shakhmat, nga kyrmen ba ha kine ki ar-lai snem ban wan, ngin sa ïohi ia ka jingpynmih bun ka bording na ka sngi” ula ong.
U Myntri Rangbah u pyntip ba ka Sorkar ka la iatrei ryngkat ryngkat bad ki bor pynmih bording na ki Thermal Plant namar “Ngi kwah ba mynta ba la ai licence ban tih dewiong, ngi kyrmen ban ngin lah ban sdang noh ïa ka thermal plant ruh bad kane ka lah ban long ka lynti ban neh slem kaba ngi lah ban ïohi ha kine ki 3-4 snem ban wan”.
Haba pynpaw ïa ka jingsngewkhia halor ka dor ka mur jong ka bording, u Conrad ula ong ba ka Jylla kam don satia ïa ka bor ba pura halor ka dor ka mur bala buh da ka MeECL namar ïa kane ka kam la khmih da ka Regulatory Commission.
Kat kum ka jingong jong u, namar kane, ki nongpyndonkam bording kila hap ban siew kham bun ban ïa ki karkhana. Ki Nongpyndonkam bording kila hap siew ïa ka bai bording ha ka bor ba T. 6 katba ki karkhana ki siew ha ka dor ba T. 5.
“ïa kane ka dor la buh da ka Regulatory Commission wat hapdeng shibun ki jingkyrpad ba ki karkhana ki dei ban siew kham bun. Ngi khlem pat ïoh ïa ka jubab na ki bad ngi dang ïakren bad ki bad ngi la pyrshang ruh ban pynbeit ïa kine ki kam bad ruh ïa ka dor ba la buh sha ki nongpyndonkam bording kaba kham rit haba ïanujor bad ka dor ba ka MeECL ka hap siew mynta” ula ong.
U la ïathuh ruh ba mynta ka sngi ka Kynhun Myntri ka la mynjur ruh ïaka Chief Minister’s Solar Mission.U la ong ba ka jingthmu jongka mission ka long ban pynkhlaiñ ïa ka jingpynmih bording da kaba ym ktah ïa ka jingjyrngam ka mariang.
U la ong ba ka sorkar kan ai subsidy ïa ki longïing longsem, ïa ki skul, ki college ha sor bad ka nongkyndong khnang ba kin ïoh ban thied ïa ki tiar na ka bynta kane ka solar energy khnang ba kan pynlong ïa ki briew ban shaniah than tang ha ka bor ding ba pynmih da ka um. U la ïathuh kan sdang noh ïa kane ka Solar Mission u Myntri Rangbah naduh ki kyndiat bnai ban wan.