Lada ïaid kat kum ka kaiphot 2011 kiba bun ki shnong Khasi kin leit sha Assam : HYC

Shillong, Nailur 26: Ka Hynñiewtrep Youth Council(HYC) ha ka sngi Nyngkong ka la pyn9long ïa ka jingsam paidbah ïa ki kot lyngkdop kaba la jer kyrteg “Ka MoU Be-aiñ Beiriti-Ki Jingma Ïa Ka Ri Bad Ka Jaidbynriew Hynñiewtrep” kaba kren shaphang ka jingduhnong ka jylla na ka soskular ïa pynbeit pud bad ka jingduhnong kaban jia lada ka sorkar ka ïaid sha khmat ban pynbeit pud kat kum ka kaiphot ba la aiti da ka sorkar Congress ba la ïalam da u Dr Mukul kum shi bynta ban rakhe ïa ka lyngkhuh sngi khlad ba hynñiew u Maieid Hoping Stone Lyngdoh uwei na ki nongïalam jong ka jaidbynriew uba ju kren bad ïakhun tyngeh ban pynbeit ïa u pud u sam bad ba ki jaka kiba la kam ba ki dei kiba la ïakajia ki dei ki nongkynti jong ki Hima Khasi.
Haba kren sha ki lad pathai khubor u General Secretary ka seng u Samla Roykupar Synrem u la ong ba kane ka jingsam ka HYC ka dei ban pynshai paidbah ïa ka jingduhnong kaba kum ka jaidbynriew ngi la mad na ka daw ka jingsoi ïa ka MoU kat kum ka kaiphot 2011 wat hadien ba ka la ap ïa kiba bun ki shnong kiba dei hapoh ki jylli synshar ki Hima Khasi kim don satia ha kane ka kaiphot.
U la ong ruh ba lada ka sorkar kan ïaid beit sha khmat ban pynbeit ïa u pud u sam ha ka Wat kaba Ar kat kum ka kaiphot 2011 kan dei ruh ka jingduhnong kaba khraw ïa ka jaidbynriew namar kiba bun ki shong kiba dei ki bynta ki Hima Khasi khamtam eh ha ki thaiñ Block I bad Block II kin leit sha Assam naba tang khyndiat tylli eh ki shnong kiba ka sorkar ha u 2011 ka kam ba ki dei jong ka jylla.
U la ong ruh ba ka jingailad ka sorkar ïa ki briew ban jied la ki kwah ban leit sha Assam ne Meghalaya ka dei ka jingduh kaba khraw ïa ka jylla namar kiba bun hi ki shnog kiba dei hapoh u pud u sam ki Hima Khasi ki kiba la shong sgnong da miwei pat ki jaidbynriew kin kwah beit ban leit sha Assam.
Shuh shuh u la ong ruh ba kane ka ingsam jong ka seng ïa kine ki kot lyngkdop ka long ban pynshai paidbah ba ka donkam ba ka sorkar ka dei ban pynbeit biang ïa ki kyndon kiba la soi ha ka MoU namar lada ym kumta ka dei ka jingduh kaba khraw ïa ka jylla.
U la ong ruh ba ka sorkar naduh kaba sdang jong ka jingpynbeit pud jong ka Wat kaba Nyngkong ka la bakla namar ka khlem pan jingmut bad ïoh ka jingmynjur na ki Hima kiba dei ki trai jong ka jaka bad wat ïa District Council kaba dei ka nongpeit ïa ka khyndew ka shyiap.
Ïa kane ka jingsam kot lyngkdop ka HYC ka la sdang na ki bynta ka IGP ter ter shaduh Motphran bad sha kiwei pat ki bynta jong ka sor Shillong.