Lada ïa pyni bor ki sengbhalang bad ka Sorkar nang ïap thngan kiba shu bylla sngi

Shillong, Naiwieng, 27: Ki nongdie jaiñ ha Khasi Market ki la pynpaw ïa ka mynsiem jingsngewlem ïa ki bahaing hasem kiba la duhnoh ïa la ki jong ki san ngut ki baieid ba thoiñ ha ka jingjia ha ka shnong Mukroh, West Jaiñtia Hills District kiba la shah siat ïap ha ka jingshah synreit kuli ha ki Pulit Assam ha ka step 22 tarik, Naiwieng, 2022.
“Ka long kaei kaei kaba sngewsih haba ngi duh noh ïa ki mynsiem ba kordor ha ka por ka bym pat dei khamtam ïa ki rangbah kiba kit ïa ka ïing ka sem, ka kur ka jait. Ngi pynpaw ïa ka jingsngewlem sha ki bahaing bahasem kiba la duh noh ïa ka mynsiem ba kordor ka jong ki ha ka jingjia ha Mukroh, ha kaba ki la shah thombor ha ki Pulit Assam,” ong u kyrwoh ba la phah da ka Secretary jong ka Khasi Market ka Kong Larisuk Rani.
“Ngi ki nongshong dukan baroh ngi da kyrpad jur ïa ka Sorkar ba kan tehlakam bad ruh ba kan pynbeit noh ïa kine ki jingïakajia khappud bad ka jylla Assam khnang ba ka shongsuk shongsaiñ ha ka ri baieid jong ngi kan bit kan biang pat sa shisien bad ngi da kyrpad rit ruh ïa baroh ki sengbhalang bapher bapher ba phin sngewbha ban sngewsynei lem ïa ngi ba phin nym ïakhih da ki jingïakhih ki ban pynduh sngi ne pynduh ja ïa ngi ki nongshong iew baroh, namar kine ki bnai ki dei ki bnai kiba ngin ïoh ban kamai na ka bynta ka jingdonkam jong ka ïing ka sem bad ki dei ki bnai kiba tang kine arbnai kiba ngi lah ban kyntiew ïa ka kamai kajih ka jong ngi,” la kyrpad ki nongshong die jaiñ ha Khasi Market.
“Ngi da kyrpad rit ïa ki sengbhalang baroh ba lada ki don kino kino ki jing ïapyrshah ha ka liang ka jingïapynbeit bad ka Sorkar kin sngewbha ban ïaid da ka lynti kaba jai jai khnang ba kan nym ktah ïa ka ïoh ka kot jong ngi kiba bylla sngi bad ruh ba kan ym pynduh ja ïa kiba bun ba lang kiba im kamai jakpoh da kaba bylla mynstep bam da miet,” ong u kyrwoh bad bynrap, “ha,oid, ngi long kiba kloi ban ïasnohktilang bad ka Sorkar ne bad ki Sengbhalang bapher bapher da kata ka lynti kaba dei kaba yn nym pynjynjar ïa ngi ki duk ki suk, namar lada phi ïa pyni bor ma phi ka Sorkar bad ki Sengbhalang, kaba sngewsih ka long ngi ïap thngan ma ngi kiba bylla sngi.”
“Ha,oid, ki nongtrei Sorkar ki biang beit ka tulop hynrei ma ngi kiba bylla sngi ngi jynjar bad ngi duhnong bad ym don mano mano ba lah ban ïarap ïa ngi,” kren bynñiaw ki nongdie jaiñ ha Khasi Market.
“Kumta na ka liang ka jong ngi ki nongshong iew baroh ngi da kyrpad rit ïa ka Sorkar bad ïa ki Sengbhalang baroh ba kin sngewbha ban sngewsynei lem ïa ngi kiba shu bylla. Ngi la duh ar snem ha ka jingwan lynshop jong ka khlam COVID-19 bad ngim kwah shuh ba mynta ngin mad biang sa shisien ïa ki jingeh kumba ngi mad kum ha ka por jong ka khlam,” la kyrpad ki nongdie jaiñ ha Khasi Market lyngba u kyrwoh ba la phah lyngba ki lad pathai khubor.