Shillong, Nailar 04 : Ka sorkar kan sa bishar bniah la ka i donkam neem ban wanrah bad mynjur da ka Resolution na ka bynta ban pyntikna ba yn ym ailad satia ïa ka jingtih Uranium ha ka jylla, ong u Myntri Rangbah ka Jylla haba kren bad ki lad pathai khubor ha kane ka sngi Palei.
“Ngim pat ïakren bniah halor katei ka bynta hynrei ngin sa bishar bad lada i donkam ngin sa shim ïa ki sienjam kumba kadei,” ong u Myntri Rangbah.
Dang shen ki sengbhalang bapher bapher ki la dawa na ka sorkar Jylla ba kadei ban wanrah noh da ka Resolution ha Iing Dorbar Thawain ka jylla ban kyntu ïa ka sorkar Pdeng ba kan pynkut noh ïa baroh ki jingthmu khlong ïa u mar Uranium uba don ha ka jylla.
Na ka liang ka HSPDP kaba dei kawei na ki party kiba ieng pyrshah ïa ka jingtih ïa u Uranium naduh kaba sdang hynin ka sngi ki la leit ban kynduh ïa ki heh jong ka Atomic Minerals Directorate (AMD) North East Region, Shillong ban ioh jingshai halor katei ka bynta. Katkum ka jingïathuh da ki nongïalam ka HSPDP, lyngba u President Bah KP Pangnïang u la ong ba na ka liang ka sorkar pdeng hi haduh mynta kam don shuh ka jingthmu ban khlong ïa utei u mawpoh khyndew uba don ha ka jylla Meghalaya.
