Shillong, Jymmang 21 : U Myntri ka sorkar jylla, Bah Kyrmen Shylla ha ka sngi Balang u la ong ba ki paidbah ki dei ban kiar katba lah ban shim hi halade ïa ka ain namar lada mih ki jingjia ba duh ei ki mynsiem briew ka jingduh kadei kaba khraw bha.
“Haba don kino kino ki jingjia dei ban ujor beit sha ki pulit bad sha ki bor ba dei peit namar kam bha ba phin shim hi ia ka ain ha la ka jong ka kti,” u la ong haba kren halor ka jingjia dang shen ha Lumshnong kaba la poi haduh u pud ba uwei u rangbah u la duhei ïa la ka jong ka jingim.
Nangta u ong ruh ba watla ka jingbitar ka don beit ha ki briew hynrei kim dei pat ban da thang sa ia ki trok namar ka nang pynpur shuh shuh ïa ka jingisih para briew.
Ha kawei ka liang pat, u la kyntu ïa ki nongniah trok ba kin burom lang ïa ki kali rit namar u la ong ba ki don bun ki khep ba ki mih ki aksiden tang na ka daw kiba kum kitei ki jingjia kiba la wanrah ka jingsyier pat ïa kito kiba niah ïa ki kali rit.
“Kumta, nga kyntu ïa baroh kiba niah kali ba ki dei ban long lang kiba husiar namar ka jingim briew ka long kaba kordor bad kam long ruh kaba shongnia ba tang namar ka jingbakla jongno re yn shu duh ei ka jingim briew,” u la ong.
