Lada buh Police Out Post ha Mukroh buh u nong Jaiñtia namarba u tip ïa ka jingeh: Lamphrang
Shillong, Naiwieng, 26: U President ka Hynñiewtrep Achik National Movement (HANM) u Bah Lamphrang Kharbani u la kyntu ïa ka Sorkar Meghalaya Democratic Alliance (MDA) ba ïalam da ka National Peoples Party (NPP) lada ka buh ïa ka Police Out Post ha ka shnong Mukroh ka dei ban thung ïa u Officer-in-Charge da u Pnar namarba u sngewthuh ïa ka jingeh jong ki paidbah.
“Ngi kwah ba ka Sorkar MDA lada buh ïa ki Police Out Post ha khappud sngewbha ynnai buh ïa u longheh (Officer-in-Charge) u bym dei na ka jaidbynriew Khasi-Pnar, ynnai buh da u Bihari, da u Nepali ne da u Garo. Lada dei ha Mukroh buh da u nong Jaiñtia namarba u tip bha ïa ka ïap ka im jong ka jaidbynriew. Lada dei ha Langpih buh da u briew uba na West Khasi Hills namarba u tip bha ïa ka jingeh jong ka jaidbynriew. Lada buh ïa ki Bihari, ki Nepali, kin shong hangto tang ban shna pisa hynrei kim sngewthuh ïa ka dor jong ka khyndew ka shyiap, kim sngewthuh ïa ka dor jong u pud u sam ka jaidbynriew,” la ong u Bah Kharbani haba kren ha ka jingïalang shwa ban thang ïa ki dur tyngshop jong u Myntri ka tnat Kam Pohing u Amit Shah, u Myntri Rangbah ka Assam u Himanta Biswa Sarma, u Myntri Rangbah ka Meghalaya u Conrad Kongkal Sangma hakhmat ka ingsah u Conrad Sangma ha Polo, Shillong ba la pynlong da ki san tylli ki sengbhalang kiba kynthup ïa ka HYC, ka HANM, ka JSM, CoRP bad ka EJNC.
“Lyngba ka Save Hynñiewtrep Mission ngi kren da kaba shai ïa ka Sorkar Meghalaya lada phim lah ban ïada ïa ka jaidbynriew, lada phim lah ban ïada ïa u pud u sam, ïa ka khyndew ka shyiap jong ka jylla Meghalaya, shu ai laisen suloi noh ïa ki dkhot kiba sah ha khappud,” la ong u Bah Kharbani.
“Ngin ïada hi ïa la ri bad ka jaidbynriew. Ai suloi ïa ngi katkum ka aiñ ba ki samla kiba la 18 snem shaneng kin ieng ïada hi noh ïa la ka khyndew ka shyiap,” u la ong.
Hashwa kane, u la ong ba ka por ka la dei ba ka Jylla Meghalaya kam dei shuh ban dang ïasnoh lang bad ka Jylla Assam ha ka Joint Cadre namarba kane ka pynduhnong haduh katta katta ïa ka jylla Meghalaya.
“Ka Sorkar Meghalaya ka la dei ban dawa noh ïa la ka jong ka Cadre khnang ba ki Ophisar Indian Police Services (IPS) kin dei hi ki doh ki snam na ka jaidbynriew Hynñiewtrep,” u la ong shuh shuh.