Shillong, Jylliew 13 : U Managing Director ka Meghalaya Energy Corporation Limited (MeECL) Sanjay Goyal, mynta ka sngi Ba-ar ula pyntip ba ka Tnad kan sa nang pynduna ïa ki kynta pynlip bording ha Jylla lada u slap u dang ïai bteng ban hap ha kine ki sngi ban wan.
“Lada ka jingïoh slap ka dang ïai bteng ha kine ki sngi ban wan bad ngi la pahuh ha ka jingdon um ha ki dam, khlem pep ngin pyrshang ban pynduna noh ïa ki kynta pynlip bording khamtam ha ki kynta ba donkam bording eh” ong u Goyal haba ïakren bad ki nongthoh khubor.
Ula ong ba ka Jylla kala ïoh slap ha kine ki lai-saw sngi ba la leit noh bad ka jingdon ka um ha pung Umiam ka la kiew da 6-7 phut.
“Ngi dei ban kynmaw ba ka um ha Umiam kala hiar sha u pud ka bym pat kot ha kine ki shiphew snem bala leit noh. Hynrei ka jingdon ka um mynta ruh kam pat long kaba ishngaiñ bad …lada ngim ïoh slap biang ha kine ki sngi kumba ngi donkam, kane ka um ba don mynta ka lah ban nym pat dap satia ban pynmih bording tang ha ki 10-11 sngi” ong u Goyal.
Haba pynpaw ba ka MeECL kala pynbeit mynta ban ïoh bording na ka NTPC, u Goyal ula ong “Ngi la thied kat kaba ïoh ka bording na ki ïew ban lah pynneh ïa ki kynta pynlip bording kumba long mynta”.
U pyntip ba ha kine ki 3-4 sngi, ka MeECL kam shym la pynlip bording satia ha ka por mynsngi namar ka jingïoh bording ne lah pynmih bording na ki hydro project kum ka Leshka hadien ka jingïoh ïa u slap.
Haba kylli halor ka Ganol power project, u Goyal ula ong ba mynta bala ïoh um slap, kawei ka unit kala sdang ban treikam. “Ngi la buh ïa ka thong ba ngin lah ban pyntreikam noh ïa baroh lai tylli ki Unit hapoh ka shibnai” ula bynrap.
