Lada ai jingmut ka tnad kam pohïing ka sorkar kan thung beit ia ka jingtohkit : CM

Shillong, Nailar 30 : U Myntri Rangbah ka jylla u Conrad K Sangma u la ong mynta ka sngi Ba-ar ba lada ka tnad pulit ne ka tnad kam pohïing ka ai jingmut sha ka sorkar ban thung jingtohkit halor ka jingkynnoh pyndonkam bakla jong u AIG(A) u bah G.K Iangrai ïaka bor da kaba u la pyndonkam tang marwei shimet haduh 29 tylli ki kali ka tnad pulit, ka sorkar kan thung beit ïa ka jingtohkit namar ka sorkar kam ju kynran dien ban thung ïa ki jingtohkit ban lap ïa ki jingshisha.
Haba kren ha ki lad pathai khubor u la ong “ Ai ba ka jingtohkit ki pulit kan dang ïaid shakhmat bad lada ki ai jingmut ban thung da ka jingtohkit ba laitluid ruh ka sorkar kan ym kiar hynrei kan leh ïa kaba donkam namar ym don jingeh satia ban leh ïa kata kaba donkam ban leh. Da shisha lada don kano kano ka jingleh bakla bad ka jingai jingmut jong ka jingtohkit ki pulit, ka sorkar kan sa bishar bad lada i donkam kan sa thung ïa ka jingtohkit khamtam lada ai jingmut na ka tnad kam pohïing ba peit ïaki pulit”.
“ Ngi don ha ka bor ym ban shu shong kli kti ne ban ym leh ei ei. Tangba kawei pat ruh kam long kaba dei ban shu rai kut bad ong beit ba kane ka dei kata ka bamsap ne ka scam. Kaei kaba nga mut ban ong ka long ba ki don ki khep bad kyndon ban ong ba ka dei ka scam, hato ka don ka jingpyndonkam bakla ïa ka pisa u paidbah kumta hap ban da pyrkhat bad bishar bha bin pa bin shwa ban poi beit sha kaba pynkut” ong u Myntri Rangbah.
U la ong shuh shuh ba u la dep kren kumba shitaiew tam ei ei ba haba peit na ka ba sdang jong ka jingtohkit i kumba ka don kaei re kaei kaba hap ban shim khia ha kaba ïadei bad ka rukom pyndonkam ïa ki kali, ka don ka jingpynslem, ka jingpyndonkam bakla tangba kumba ka paw pat ki don ki dak ki shin ba kam da dei kata ka scam kumba la kynnoh.
“ Hooid na ka liang ka tnad pulit ka dang pynlong ïa ka jingtohkit bad hadien kin sa ai ïa ka kaiphod bad lada ka tnad kam pohïing hadien ba la ïoh pdiang ïa ka kaiphod ka idonkam ban thung da ka jingtohkit, ka sorkar kan sa leh ïa kaba donkam bad lada dei ban pynshitom ïa u ophisar ruh ka sorkar kan sa leh kat kum ki kyndon ka aiñ” ong u Myntri Rangbah.
\ Ha ka jingtohkit jong ka tnad pulit ba la khlieh ïa ka kynhun da u Inspector General of Police ( Law and Order) u MK Singh, la pynpaw ba ki don haduh 29 tylli ki kali ba la pyndonkam da u AIG (A) G.K Iangrai shwa u bnai Iaiong 2022 khlem kano kano ka jingai jingbit na ki bor ba halor.
Kine ki kali ki kynthup ïa kawei ka Scorpio ba thymmai, kawei ka Bolero thymmai, Ar tylli ki Swift Desire ba thymmai, ar tylli ki thuk thuk Bajaj bad kine baroh kim don satia ki number plate ruh namar u AIG (A) bah Iangrai u khlem ai ïa ki kot ki sla. Kine kim dei ki BS VI Standard bad kumta ka long pyrshah ïa ka jingpynmih hukum jongka Union Ministry of Road Transport bad Highway.
Nalor kitei ki phra tylli kawei ka Bajaj Pulsar 150 cc thuk thuk kaba la thied naduh u 2019 ruh ym shym la lah ban register namar kam don ki kot ki sla ba biang. Kawei ka Hyundai Verna kaba la shu pynïeng ha Central Workshop ka don u number ba la shu thoh thok bad ym pat dep rejister ïa ka kali ne kam pat don number plate bad kane ruh kam don ki kot ki sla ba biang.
ïa kine ki kali ym shym la ai sha kino kino ki ophisar bad la shu buh bad pyndonkam beit tang da u AIG (A). Kane ka kynhun tohkit ka la tohkit bniah ruh na ki 7 ngut ki pulit kiba trei bad u AIG (A) ki la phla ba ba ïa kine ki kali ba la thied da ka Police Head Quarter la bat beit da u AIG (A). La sei bad pyndonkam ïa ki tang haba u bthah ïa ki briew jongu ban leit sei ïa kine ki kali namar la pynïeng ha Police Officer Mess lane MPRO Complex tangba ki shabi baroh ki don beit ha ka ïing sah u AIG(A). Kane ka jingphla jongki ka pynpaw ba ka don ka jingpyndonkam bakla ïa ka bor da u AIG (A) GK Iangrai.
ïa kine ki kali ba khlem don number plate la pyndonkam da u AIG (A) khlem kano kano ka jingai jingbit na ki bor ba halor. Ym shym la buh ïa ka log book wat la ïa ka umphniang la theh da ka jingai coupon ne slip jong u AIG(A) hi.
Ka jingtohkit ka lap ba ka don ka jingleh bym kheiñ snep bad jingleh bakla ha kane ka kam khamtam na u ophisar. Kane ka kynhun tohkit ka la ai jingmutba donkam ban thung da ka jingtohkit na ka tnad pulit shwa khnang ban paw ki jingshisha baroh bad ban pynshitom bad pynngat kyndon aiñ ïa u ophisar uba donkti.
Donkam ban thung da ka kynhun High Level Fact Finding ban tih bniah halor kane ka kam. Ka dei ban don ruh ka kyndon (SOP) ba la pynkhreh ha ka jingthied ïa kine ki kali, ka jingshimti bad ka jingbuh jingthoh thik pa thik.Namar ka jingbuh jingthoh ha ka tnad pulit ruh kam long kaba biang haduh katta katta. Na kata ka daw ba sa mih kine ki jingpyndonkam bakla ïa ka bor bad ïa kine ki kali.ïa ka Central Workshop jongka tnad pulit ha Bishnupur la dei ban peit da u ophisar ha ka kyrdan DIG. Nalor kine dang bun kiwei kiwei ki jingai jingmut jong kane ka kynhun tohkit ïa ka tnad pulit khnang ban ïaid beit ïaid ryntih ka rukom pynïaid ïa ka tnad pulit hi baroh kawei.