Nongstoiñ, K’lyngkot 21: Ka District Magistrate, West Khasi Hills District Smt. Hema Nayak (IAS), ka la pynmih ïa ka hukum hapoh Section 163 jong ka Bharatiya Nagarik Suraksha Sanhita (BNSS) 2023, ban khang ïa ka jingïaid jong ki kali khia ha ki katto katne ki jingkieng ha Surok Nongkasen-Nongkhlaw, na ka bynta ka jingïada bad ka jingshngaiñ ki paidbah.
Katkum ki jingtip ba la ïoh pdiang, ki pyni ba jingkieng No. 6/1, jingkieng No. 16/1 bad jingkieng No. 17/1 ha katei ka surok, ki la tlot ha ka jingtei bad ka jinglah ban kit jong kitei ki jingkieng kim long shuh palat ïa ka 9 ton.
La ïoh ruh ïa ki jingujor ba bun ki trok kiba kit palat pud ki ïaid lyngba kine ki jingkieng, kaba lah ban wanrah ïa ka jingpynjulor shuh shuh ïa ki bad ka jingma ïa ki paidbah nongleit nongwan.
Ha kaba ïadei bad kine baroh bad namar ka jingdonkam kaba kyrkieh, la khang pyrshah ïa baroh ki kali kiba kit palat ïa ka 9 metric ton ban ïaid lyngba kitei ki jingkieng ba la kdew haneng, naduh mynta hi.
Ïa kane ka hukum la pynmih kyrkieh ban ïada ïa ka jingjulor shuh shuh jong kitei ki jingkieng bad ban khanglad bad teh lakam ïa kino kino ki jingjia kiba sngewsih. Kumjuh ruh na ka bynta ban pynthikna ïa ka jingshngaiñ jong ki paidbah.
Kino kino kiba pynkheiñ ïa kane ka hukum, kin shah pynshitom katkum ka Section 223 jong ka Bharatiya Nyaya Sanhita (BNS), 2023.
La kyrpad ïa ki paidbah, ki nongñiah kali bad baroh kiba don bynta ba kin bud ryntih ïa kane ka hukum na ka bynta ka jingshngaiñ bad ka jingïada ïa ki paidbah nongshong shnong.
