la thikna ka France, Portugal & Belgium ban rung sha ka Euro 2024 hadien ba jop, kut ka jingphohsniew jong ka Republic Of Ireland

Amsterdam Arena-Netherland, Risaw 14: Ka kynhun ïalehkai phutbol bar ri jong ka France ka la ïoh ban pynthikna ïalade ban rung sha ka lympung ïakhun ki ri ka dewbah Europe ha u snem ban wan (Ruro 2024) hadien ba ka la lah ban pynliem ïa ka Netherland ha ka jingïalehkai kaba la long shabar nala ïing, ha Amsterdam Arena.
Ha kane ka jingïakhun, u khlur lehkai ka France, u Kylian Mbappe u la ïoh ban pynkhihjar ar sien ban pynthikna ïala ka ri ban ïohrung sha ka European Championship 2024 bad dang sah sa ar sien ban ïakhun.
U Mbappe u la ïoh ban plie pyrda ïa ka kol kaba nyngkong tang hadien 7 minit ba la ïaid ka por bad u la ïoh ban thep ïa ka kol kaba ar ha ka kylla miet.
Na ka liang jong ka Netherland ka la ïoh ban pynphai shi kol na u Quilindschy Hartman ha ka por ba sah sa tang 7 minit shuwa ban kut ka por jong ka kylla miet .
Hynrei ka France ka la lah ban kyrshan tyngeh haduh kaba kut ban pynneh ïa ka rekod jong ka na ka Group B.
Ka France hapoh ka jingïalam jong u Didier Deschamps kum u manager ka la jop ha baroh hynriew sien ki jingïakhun na ka lympung ïaknieh rung Ruro (European Championship qualifying match) kaba la snohlang ryngkat bad ka Belgium, Portugal bad ka ri ban pynlong, ka Germany ka jaka ban ïoh ïakhun ha ka Euro 2024.
Katba ka Netherlands ka don ha ka kyrdan ba lai na ka Group B, duna da lai point shadien ka Greece kaba ïeng ha ka kyrdan ba ar, kaba la pynkut ïa ka jingangnud jong ka Republic of Ireland ban ïohrung sha kane ka lympung da kaba pynliem 2-0 kol ha ka jingïakhun kaba la long myn Sngi Hat Majai.
Ha kawei pat ka jingïakhun, ka Portugal ka la pynliem ïa ka Slovakia da 3-2 kol, ki ar kol na u Cristiano Ronaldo ka la ïarap ïa ka Portugal ban pynthikna rung sha ka European Championship ka ban sa long ha ka aïom lyuir ban wan, bad dang sah sa lai sien ïakhun.
Hadien ka kol na u Goncalo Ramos, u Ronaldo u la ïoh ban thep ïa ka kol lyngba ka penalty shuwa ba u David Hancko un ïoh ban pynphai shi kol ha ka 69 minit.
Na ka liang jong u kapten ka Portugal, u Ronaldo u la ïarap biang ïa ka kynhun ban tam biang da ar kol lyngba ka kol kaba u la thep ha ka 72 minit kaba dei ruh ka kol kaba 125 kaba ma u, u la thep na bynta ka ri.
U Stanislav Lobotka u la pynphai biang sa shi kol na bynta ka Slovakia hynrei ka por ka lyngkot eh na bynta ka kynhun ha kaba ka Portugal ka la khur ïa ka namjop.
Kane ka mut ba ka Portugal kaba ïakhun hala ïing ka la jop baroh hynñiew sien ki jingïakhun na ka Group J ban pynthikna rung sha ka Euro 2024.
Katba ka Slovakia ka ïaisah ha ka kyrdan ba ar na Group J, ar point ka tam ïa ka Luxembourg kaba kan sa ïakhun lashai ka Lah Sngi U Blei.
Haba phai sha kawei pat ka jingïakhun, ka jingapkhmihlynti jong ka Republic of Ireland ban ïohrung sha ka European Cup 2024 ka la kut noh hadien ba ka la shah pynliem ha ka Greeceda 2 kol.
Ki kol ba la ïoh ban thep ha ka kylla step na u Giorgos Giakoumakis bad u Giorgos Masouras ka la pynlong ïa ka Greece ban kyntiew ïalade bad knieh ïa ka kyrdan ba ar na ka Netherlands ha ka Group B.
Katba na ka liang jong ka Belgium ka la pynthikna ïalade ban rung sha ka Euro 2024 da ka namjop pyrshah ïa ka Austria.
Kane ka jingïakhun kaba la long ha Vienna ka la jam sha kaba kut ha kaba ka Belgium ka la pynliem ïa ka Austria kaba ïakhun hala ïing da 2-3 kol.
Ka Belgium ka la ïoh ban pynkhihjar na u Lukebakio (12′, 55’minit), Lukaku (58’minit), katba u Onana u la shah beh hadien ba ïohpdiang ar tylli ki yellow card. Na ka liang jong ka Austria ki ar kol la thep da u Laimer (72’minit), Sabitzer (84’min lyngba ka penalty). Lyngba kane ka namjop ka Belgium ka la thikna ban ïoh ïakhun ha ka Euro 2024 ka ban sa long ha Germany.