La thaw ïa ka Committee ban peit ïa ka Krem Mawjymbuiñ, kwah long dkhot ka Yatra Committee

Shillong, Nailar 22: Ka High Court of Meghalaya lyngba ka Kashari jong u Chief Justice (Acting) u Justice HS Thangkhiew ha ka sngi Palei ka la shim bishar biang ha kaba ïadei bad ka mokotduma jong ka seng kiba ju ïaid Yatra sha Mawjymbuiñ pyrshah ïa ka sorkar jylla, ka Dorbar Shnong bad kiwei kiwei kiba la shah mudui ne respondents, bad ha kaba ha ka sngi balang na ka liang ka Muktiar ba mih khmat ïa ka Deputy Commissioner ka East Khasi Hills ka la kdew ha ka Court ba ha kaba ïadei bad ka jingbthah jong ka ban thaw ïa ka committee na bynta ban peit bad pynbha ïa ka krem Mawjymbuiñ ha Mawsynram la dep ban thaw bad ïa ka notification la pynmih hynnin ka sngi jong ka 21 tarik Nailar.
Ha ka hukum ba la pynmih u Justice HS Thangkhiew u la Kdew ba ïa ka District Level Committee la dep thaw na bynta ban sumad (maintenance) ban pynïaid (management) bad kiwei kiwei ki mat kiba ïadei bad ka krem Mawjymbuiñ ha kaba ïa kane ka Committee yn khlieh da ka Deputy Commissioner kum ka Chairperson bad u Additional Deputy Commissioner pat u long u Member Secretary, nalor kiwei pat ki dkhot.
Ha kaba ïadei bad ka jingthaw jong ka Deputy Commissioner ia kane ka Committee na ka liang u muktiar ba mih khmat ïa ki nongmudui ne ki kynhun ïaid Yatra u la pynpaw ba khlem shym la kynthup lang ïa ki nongmudui mokotduma ha kane ka committee.
Shuh shuh u la kdew ba ha kane ka notification ba la pynbna ïa ki dkhot ka committee ki don ruh ki kyndon treikam ne term of reference jong ka committee ha kaba u la pan por ban pule bniah shuwa ba un ai ïa kino kino ki jingkynthoh ha kaba na ka liang ka Kashari ruh ka la ai lad ïa kane bad rai ban shim bishar biang ha ka 6 tarik Nailur 2024.
Haba dang shim bishar ka la don ruh ka jingpyni na ka liang jong u muktiar kiba mudui mokotduma u la pyntip ruh ha ka Kashari ba la kynthup pynban ïa ka Central Puja Committee katba ïa ki nongmudui pat khlem shah kynthup, u la ong ruh ba ha ka jingshisha ka Central Puja Committee ka la kyntait ban long dkhot ha kaba sdang. Na ka liang ka Muktiar ba mih khmat ïa ka Deputy Commissioner ka la ïathuh hakhmat ka Kashari ba ki kloi ban pynmih biang da kawei ka notification ha kaba yn buh noh da ka Yatra Society ban long dkhot ha jaka ka Central Puja Committee hynrei na ka liang ka Kashari kam pat shym la shim rai eiei halor kane
Lah ruh ban sngewthuh na ka jingïakren ne ka oral remark bad ka oral observation hapdeng u nongbishar bad ki muktiar ba wat u Chief Justice Acting u HS Thangkhiew u la kdew ba wat ïa ka seng Khasi khlem shym la kynthup lang ban long ki dkhot ka commitee.