La tep donburom ïa u samla Fullmoon Kharsahnoh

Khliehriat Nailar 20 : Ha ryngkat ka jingsngewsih kthang, ki ba ha iïng, ki lok ki jor, hynnin ka sngi, la tep donburom ïa ka met jong u samla Fullmoon Kharsahnoh ha u lum jingtep jong ka balang Presbyterian Larnai West Jaiñtia Hills District, na ka liang ka iïng ka sem bad ki paralok ba ïa ñiah kali lang kiba hapoh ka shatri jong ka Jowai-Shillong-Guahati Torist Cab Association, ki la pynpaw ka jingsngewsih kthang halor ka jingduh noh ïa u samla Fullmoon Kharsahnoh uba la shah pyniap dusmon ha ki runar kiba ym lah satia ban tip.
Ka kong ïateiskhem Kharsahnoh, ka ba dei ka hymmen jong u samla Fullmoon Kharsahnoh ka la pynpaw ka jingsngewsih bad sngew kthang namar ka jing shim kabu ki riew thrang snam kiba la dkhat jubor ïa ka mynsiem ba lui lui jong u para jong ka bad ong ruh ba une u para jong ka u dei uba lui lui u bym ju don kano kano ak dak sniew badno badno ruh.
Ka kong ïateiskhem, ka ai ruh ka jingkhublei sngewnguh ïa ka tnat pulit jong ka Jowai Police Station, ka Ummulong Police Station bad ka Khliehriat Police Station, kiba la trei shitom bad shim khia ban wad ïa u para jong ka, kumjuh ruh ka ai khublei ïa u Waheh Shnong Larnai, ïa ka KSU East Jaiñtia Hills bad KSU West Jaiñtia Hills, kumjuh ruh ïa ka Jowai Shillong Guahati Tourist Cab Association kiba la iarap lem bad don ha syndah bad ka iïng ka sem bad ïarap ban pynpoi kloi ïa ka met sha iïng.
Na ka liang ka iïng ka sem ka kyrpad bad kyntu ruh ïa ki bor ba halor bad ki bor ka aiñ ba kin ïaleh shitom ban wad, ban thwet bad ban kem ïa ki briew kiba donkti ha kaba pyniap ïa u Fullmoon Kharsahnoh, khnang ba kiwei ruh kin nym mad ïa kaba kum kane ka apot “Lyngba ka jingiarap ki bor kiba halor kiba don ka bor ban wad ïa ki runar, kan long ka jingiada ïa ki nongshong shnong bad ka jingshngaiñ ïa ka ri bad ka jaitbynriew baroh kawei”
Kum ban shu phai dien, Ki runar thrang snam, ki bym lah satia ban tip myn ha ka 16 tarik mynta u bnai ki la pyniap dusmon ïa u samla Follmoon Kharsahnoh, uba na ka shnong Larnai, (West Jaintia Hills District) uba dei u nong ñiah kali kamai (torist Taxi) ba ju kamai Jowai-Shillong, ïa ka met jong utei u samla la lap na ka shnong Mynkre, East Jaiñtia Hills District na ka lynti ban leit sha Amrit Cement katba ïa ka kali pat la lap lyngba ki camra ba ka la ïaid lyngba na ka toll gate Lumshnong ha ka por kumba 2 baje nohphai sngi ba la ñiah da kiwei pat ki briew.
Utei u samla, u dei uba ñiah ïa ka kali Swift Desire kaba don ïa u registration number ML-04-D-1113 bad u jah naduh ka por mynsngi jong ka 16 tarik bad dei ha ka por la lap ia ka met iap jong u na Mynkre na ka lynti ban leit sha Amrit Cement bad ki pulit jong ka Khliehriat Police Station ki la leit ban shimti ïa ka met iap bad ki la pyntip ruh sha thanat Ummulong , West Jaiñtia Hills District, ïa ka met iap la rah ha ka jaka buh met iap ha Khliehriat CHC bad hadien ba la pyndep ïa ki kam kiba katkum ka aiñ, mynta ka step ki pulit ki la aiti noh ïa ka met ba sah sha kiba ha iïng ha sem.