Shillong, ïaïong, 09: Ïa ka met ba dang sah jong u Bah Robert Kharshiing uba dei ruh u MP barim jong ka Jylla Meghalaya sha ka Iingdorbar Thawaiñ Rajya Sabha la tep donburom ha ka sngi Saitjain ha u Lum Jingtep jong ka Balang Catholic ha Laitumkhrah, Shillong.
Hashwa ban rah leit ontep ïa ka met, la pynlong ïa ka jinglehniam ha phyllaw ïing ha Bomfyle Road, Lachumiere, Shillong kaba don mar pyrshah bad ka Stephen Hall ba la pynïaid da u Parish Priest jong ka Cathedral Parish, Laitumkhrah u Rev. Fr. Pascal Lyngdoh.
Hadien ba la wai ka jinglehniam, la pynbud pat sa ïa ka jingïalang sngewlem bad ai khublei khatduh ïa u Bah Robert Kharshing da ki kynhun bapher bapher bad kynthup ruh ïa ki nongïalam jong ka Khasi Students Union, Sengkmie, u Syiem jong ka Hima Khyrim u Dr. Balajied Sing Syiem bad la pule ruh ïa ki kyrwoh sngewlem ba la phah da u Myntri Rangbah ka Jylla u Conrad Kongkal Sangma bad kiwei kiwei.
U Bah Robert Kharshiing, u dei u khun jong u MLA barim u Prof. Martin N. Majaw bad ka Kong Edith M Kharshiing.
Ha ka jingshakri paidbah u la shah jied kum u MLA ha ka ilekshon shiteng samoi ha u snem 1990-1993, u la long ruh u MP barim jong ka Rajya Sabha ha ki snem 2002-2008. Shwa kane, u la long u nonghikai ha St Anthony’s High School bad hikai ruh shipor ha St.Xavier’s Mumbai.
Ha u snem 1981 u la shah jied kum u President jong ka KSU haduh u snem 1983. U la shakri kum u Rangbah Shnong jong ka shnong Laitumkhrah naduh u snem 1983 haduh 1985. U la long u Rangbah Shnong ba khynnah tam hapoh Laitumkhrah, u la long u nongai jingmut ïa ka Seng Samla Laitumkhrah bad ïa ka seng Kynthei.
Kum u riewsaiñ pyrthei, haba u la shah jied kum u MLA ha u snem 1990 u la pynbna ïa ka jingdon jingem. U la ïakhun ïa ka elekshon MLA na Nongkrem Constituency da ka jingkhot jong ki paidbah. U la long ba u nongai jingmut ïa u Mytnri Rangbah barim ka jylla u Salseng C. Marak ban pynkha ïa ka Meghalaya Economic Development Council (MEDC) ha kaba la ai bun tylli ki jingai jingmut.
Ryngkat lang bad u Bah Stanley Nichols Roy, u MLA barim, u ai jingmut ban thaw ïa ka Meghalaya Community Relations Council kum shi bynta ban wanrah ïa ka suk ka saiñ ha ka Meghalaya.
U la long u MP uba nyngkong uba la bat ïa la ka kular ban ai bhah ryntih ïa ka MP Scheme sha ki Dorbar Hima, Elaka bad ha ka jinglong MLA na Laitumkhrah u la ai beit ïa ka MLA Scheme sha ki Dorbar Shnong bad u la ai ruh ha ki ban kin rai ïano bad mano ban pyntreikam ïa ka skhim bad u la ai ryntih ïa ka MLA Scheme ïa baroh ki shnong khlem da peit liang.
U la bat ruh ïa ka kular ban ai bhah na ka MP Scheme sha ki Balang, Sengbhalang kiba la paw, ki Skul, ki MLA, MDC jong baroh ki Party bad khamtam ïa ki Dorbar shnong, Raid bad Hima /Elaka sha nongkyndong namar kim hap hapoh ka Municipal lane Urban.
Ha ka jingïakren hapoh Parliament shaphang ka jingïaumsnam ha Gujarat, ka jingkren jong u Bah Robert Kharshiing ka la ktah ïa u Myntri Rangbahduh ka ri u Atal Behari Vajpayee haduh ba u jubab da kaba shim ïa ki kyntien ai jingmut jong u Bah Robert Kharshiing haduh saw sien ha ka Parliament.
Bun ngut ki MP kiba la kham shwa ki la lyngoh ngaiñ bad kiba bun ki MP kiba long Myntri ki da phah ïa ka shithi ai khublei ïa u Bah Robert Kharshiing kum u MP ka Rajya Sabha jong ka jylla Meghalaya halor ka jingkren jong u kumno ban pynïasuk ïa ka jingïaumsnam ha Gujarat.
Kum u MP u la ïoh ban bat ïa ka kam Vice-Chairman ha ka All Party Parliamentarians & Proffessionals Forum, kum u Chief Whip jong ka NCP Rajya Sabha, kum u dkhot ka Joint Parliamentary Committee on the Welfare of Schedule Castes & Scheduled Tribes, kum u dkhot jong ka Parliamentary Consultative Committee on Defence, kum u dkhot jong ka Parliamentary Standing Committee on Commerce, kum u dkhot jong ka Indo-US Parliamentary Forum, kum u dkhot jong ka Indo French Parliamentary Group, kum u dkhot jong ka Indo German Parliamentary Forum bad kum u dkhot jong ka Indo British Parliamentary Forum.
U la bat ruh kum u Joint Secy jong ka World Bank Parlaimentarians Network. U la long u MP uba nyngkong eh lehse hadien u Prof. GG Swell ha kaba ha Parliament bun ki MP ha Rajya Sabha ha Delhi ki da burom haba u ieng ban kren ha ka Dorbar namar ki kyntien bad ka rukom im jong ki.
U General Shankar Choudhury, u MP Rajya Sabha barim uba la long ruh u Chief of Staff jong ka kynhun shipai mynshwa u da kren ïaroh kyrpang hakhmat ka Parliament ïa u MP Rajya Sabha uba la kren tyngeh ha kumno ba ka India ka ladei ban pynlaitluid ïa ka pisa tyngka ha ka Ri India.
Ki kyntien ksiar bad ki jingïohi jngai ki dang ïai sah kynmaw ha ki jingpynbna paidbah ha u snem 1999 bad 2000 da u Bah Brington B. Lyngdoh, u Myntri Rangbah barim ha kiba bun ki jaka ha ki thaiñ Pynursla bad Lyngkyrdem sha ka thaiñ Ri-war ha ryngkat u Bah Robert Kharshiing ba u ban shimti ïa ka kam Myntri Rangbah.
Ha ka elekshon MLA 2003 u Purno A. Sangma u la tyrwa ïa u Bah Robert Kharshiing kum u Chief Minister lada ka NCP ka jop ïa ka Elekshon.. Ka dei da ka jingkyrshan ba radbah jong u Bah Robert Kharshiing, ba la lah ban lum ïa ka Dorbar Ri kaba nyngkong eh ha ka 14 tarik, Kyllalyngkot, 2004 ha Smit, Hima Khyrim bad kaba ar pat ha u bnai Risaw, 2007 hakhmat ka Law Lyngdoh Hima Mawphlang kaba la pynïatylli ïa ka Ri bad ka jaidbynriew ha ryngkat ka jingïatreilang jong ki khlieh nongsynshar.
