La tep don burom ïa ka samla ba shah pynïap ha la u samla ha Pahamsyiem, mih bun ki jingpynrem bad dawa pynshitom

Nongpoh, Nailur 27: Kiba haing hasem bad ki bor shnong ka Shnong Iewmawlong mynta ka sngi ryngkat ki ummat bad ki jingsngewsih khtang ki la tep don burom noh ïa ka met ba dangsah jong ka samla kaba la shah pynïap ha la u jong u Baieid hynnin ka sngi nyngkong jong ka taiew ha ka shnong Pahamsyiem ha Ri Bhoi District.
Kum ban pynkynmaw, kane ka samla ba la tip kyrteng kum ka Nisha Nongbet ha ka rta kaba 19 snem na ka shnong Iewmawlong ha Ri Bhoi ka la shah pynïap ha la u jong u Baieid uba dei u Jaid Byrniew Nepali ba la tip kyrteng kum u Dilbahadur Thapa ha ka 26 tarik u Nailur 2022 ha ka shnong Pahamsyiem bad kane ka jingshah pynïap kane ka samla ka pynpar ñiangkhriat shisha ïa ki paidbah ba utei u runar u la nud ban shim ïa ka jingim katei ka samla da kaba dung da ka tari bad ot ruh na ryngdang haduh ba ka la duh syndon ïa ka jingim khlem pat dei por.
Na ka liang kiba haing bad ka shnong mynta ka sngi hadien ba la pyndep ïa ka post mortem ki la leit ban shimti noh ïa katei ka met ba dangsah katei ka samla na ka bynta ban tep don burom ha u lum jingtep ka Shnong Iewmawlong.
Shuwa ban tep ïa ka met jongka, la pynlong ruh ïa ka jingduwai ba kyrpang da ki nongïalam niam ka Balang U Blei na Pahamsyiem.
Hadien ba la dep ban tep noh ïa ka met jong katei ka samla, la ai ka jingkren ban pynrem ïa utei u runar da u Rangbah Shnong, u Bah Vicky Syngkli, uba la dawa ba ki bor ka aiñ ki dei ban pynshitom jur ïa utei u runar bad na ka liang ka bor shnong ruh ki pynrem jur halor kane ka jingjia kaba ym lah ban pdiang ha ka imlang ka sahlang.
Shuh shuh, u la ong ruh ba ka bor shnong ka ai ruh ïa ka khubor sngewlem sha ka ing ka sem jong kane ka samla ba kin dang don hapdeng ka jingkoit jingkhiah bad ruh ba u Blei ka jingsuk un dang pyntngen ïa ka ing ka sem kiba la duh noh ïa kawei na ka dkhot jong ka ing ka sem kaba long ka jingdunong bad ka jingsngewblaw kaba jur.
Haba kren halor utei u runar, une u runar uba la don kti ban shin ïa ka jingim kane ka samla u dei na ka jaid bynriew Nepali ba la tip kyrteng kum u Dilbahadur Thapa bad na ka liang ki pulit ka Ri Bhoi ki la dep ban kem ïa u bad la pynngat ha ka kyndon aiñ jong ka section 302 IPC kaba dei halor ka kam pynïap briew.