La shu thok, ong u Myntri Rangbah ïa u MLA ka Umroi halor ka ishu pynbeit pud

Shillong, Nailur 12 : U Myntri Rangbah ka jylla, Conrad K Sangma ha ka sngi Nyngkong u la ong ba u Chief Whip jong ka Liang Pyrshah, Bah George B Lyngdoh u la shu thok ban ong ba ka sorkar ka khlem ïa syllok lang bad ki paidbah ha ka por ba soi ïa ka Memorandum of Understanding (MoU) bad ka Assam na ka bynta ban pynbeit noh ïa ki hynriew tylli ki jaka ba kajia ha ka kylla kaba nyngkong.
Katei ka mat ka la wanrah ruh ïa ka jingïatai kaba khluit bha hapdeng kitei ki arngut ha ka Dorbar Synrai kaba long ha kane ka sngi Nyngkong.
“Ka long kaba sngewsih ba u dkhot ka ïing u pyrshang ban ïalam bakla bad nga lah ruh ban ong ba kadei ka jingthok,”ong u Conrad haba jubab halor ka jingkynnoh jong u Bah George ba kam don satia ka jingïatai bad ki paidbah ha ka kylla kaba nyngkong.
Utei u Chief Whip ka Liang Pyrshah u ong ruh ba dei hadien ba la kut ka kylla kaba nyngkong ba ki Hima bad ki paidbah ki la pyrshah ïa ka jingsoi ïa ka MoU bad ki jaka kiba la ai sha ka Assam da ka sorkar jylla.
Hynrei, u Myntri Rangbah pat u la ong, “Ha ka jingshisha ka jingïakren ha ka kylla kaba nyngkong ka la long bunsien bha bad ki paidbah bad kadei ruh ha ka sien kaba nyngkong ba ki myntri sorkar ryngkat ki heh sorkar ki la leit shaduh ka jaka ba shah ktah ban pynlong jingïalang kaba ym pat ju leh mynno mynno ruh.”
Da kaba kyntu ïa u MLA ban kiar na kaba pynmih ïa kum kitei ki kyntien, u Myntri Rangbah u laong, “Phi don ha ka Ïing Dorbar kam dei satia ka press conference, kumta dei ban kren ïa kaba dei ka jingshisha.” Katkum ka jingong jong u, baroh kiba don bynta ha katei ka kam, kynthup naduh ki district counicl, ki sengbhalang bad kiwei kiwei ki la ïoh ban ïa syllok lut ha ka kylla kaba nyngkong jong ka jingïakren pynbeit pud.
Haba pynphai nia kylla, u Bah George u la kyntu ïa u Myntri Rangbah ba u dei ban kiar na kaba pyndonkam ïa ka kyntien, ‘ki dkhot ki thok’ bad ong ruh ba katkum ki kyndon ym lah satia ban kynnoh kumta ha ki dkhot jong ka Ïing.
U ong ruh ba ka KHADC ka la dep ban mynjur da ka Official Resolution ban pyrshah ïa ka jingsoi ïa ka Memorandum of Understanding (MoU). “Ngi don ruh ïa ki shithi na ka Hima Mylliem kaba pyrshah ïa ka MoU. Ngi don ruh ki paidbah kiba ieng pyrshah namar kim kwah ban leit sha Assam. Ban khot ïanga u riewthok kam lei lei namar ka shong ha ki paidbah ban bishar,” ong u Bah George.
Shuh shuh u la buh jingkylli ba kumno u Myntri Rangbah u khie dom haba u kren ïa ka jingshisha.
“Nga kwah ban kyrpad ïa ka sorkar namar myn ha kane haba ngi pan ïa ka draft MoU ban wanrah hapoh Ïing Dorbar ka khlem long satia bad bun ki jaka ki la duh kumta ha kane ka kynti kaba mynta bad ha ka kylla kaba ar ban syllok kum ka Ïing khnang ban ïoh ban ïatai sani naduh tynrai ha shwa ba ka sorkar kan ïaid shakhmat ban rai khatduh,” u la bynrap biang.
U Myntri Rangbah hadien kane pat u la ong ba ka daw kaba u ong ba u dkhot ka Ïing u pyrshang ïalam bakla kadei namar u ong ba ki paidbah kim shym la ïoh lad satia ban ïa syllok.
“Da kaba ym treh ban mynjur lane pyrshah kam mut pat ba ka jingïakren ka khlem don,”u la ong.
U Conrad u la kular ruh ba baroh kiba don bynta ha katei ka kam kin ïohlad ban ïa syllok lang ha ka kylla kaba ar jong ka jingïakren pynbeit pud ban pynbeit na ka bynta ki hynriew tylli ki jaka kiba dang don hapdeng ka jingïakajia.
“Ka jingïakren kam dei satia kaba tang shisha hynrei ka kam ka la ïaid bad haba ka la ïaid, ngin sa khot khot ban ïa syllok lang, ngin sa don ka jingpynshai paidbah bad bun ki jingïalang ha shwa ba ngin ïaid shakhmat.” Shuh shuh u Myntri Rangbah u la kyntu ruh ïa ka Liang Pyrshah ba kam dei satia ban ïaleh politik haba ïadei bad ka ishu khappud.
“Nga kwah ban kyrpad namar kane kadei ka ishu kaba khia bad kam dei satia ka ishu ban ïalehkai politik. Kumta kiar ban leh politik,” u ong da kaba kyntu ïa ka Liang Pyrshah ban ai jingmut kiba tei haba ïadei bad katei ka bynta.