La shu plie beaiñ ïa ka Pine Club ha Queen’s Hotel ong ka RBPC, dawa ban weng mardor

Nongpoh, Nailar 04: Ka seng Ri-Bhoi People’s Council, sengkmie lyngba u Bah Jayson Lennox Nongrum President kala ther tyngeh bad pyrshah jur ïaka jingplie beaiñ ïaka Pine Club ha Queen’s Hotel kaba hap haka shnong Mawsmai ha ka thaiñ Jorabat, khlem da ïaid da ki lynti kiba dei ban shu thom da ka bor tang namar ka jingdon ki nongkyrshan kiba heh ba haiñ.
Haba kren sha ki lad pathai khubor mynta ka janmiet naka liang u Bah Jayson Lennox Nongrum President ka seng haka jingdonlang u Samla Victor Sulein Assistant Organising Secretary u la ong ba kalong kaei kaei kaba sngew lyngngoh ba tang 1 sngi hadien ka jingkren u MLA ka Jirang u Bah Sosthenes Sohtun sha ki lad pathai khubor ban phah tohkit halor ka jingkynnoh pynïaid beaiñ ïaka Night Club bad ki kam khalai la sakhi ba haka sngi kaba bud la leit ban plie paidbah syndon ïaka da ki riew heh naduh u actor Govinda da ka jingsakhi lang ruh u James PK Sangma myntri barim ka sorkar jylla ba dei ruh u Chairman ka MIDC.
U la ther tyngeh ruh ïa ki briew ba donkti ha katei kam bala kynnoh pynïaid beaiñ ba u MLA bad ki bor district ki dei ban ioh jingtip haba pynïaid ïakum kitei ki jait kam, hynrei wat u MLA u kyndit ban iohi ba tang haka sngi ba bud la leit ban plie paidbah syndon ïaka bad lada katei ka Pine Club ka don ïaki kot ki sla ki bor district kila dei ban pyntip sha u MLA, hynrei kumba ka seng kala wad jingtip kam don satia kano kano ka jingpyntip sha ki bor district bad wat sha u SP ka Ri-Bhoi.
Kum ka jingwad bñiah halor katei ka kam, naka liang ki nongïalam seng kila pyrshang ruh ban tohkit na ki bor pynïaid shnong ka shnong Mawsmai ha kaba kila pynshai ka Dorbar Shnong kala ai NOC 5 bnai mynshuwa tang naka bynta ban pynlong ïaki jingïakynduh paidbah bad kumjuh ruh ki Indoor Games ym ïaka Khalai ne ka Night Club, hynrei aiu ka shnong kan leh mynta haba hadien bala iohi shai kdar bad ka NOC kam ïahap bad ka kam kaba ki pynïaid ha katei ka Hotel bad ka jingkyll ka mih ruh lada ka dorbar shnong kam shym la ai jingbit ban pynïaid ïakata ka Pine Club mano pat ba ai mynsiem bad kyrshan ban pynïaid shakhmat bad kum ka seng ka sngewthuh shai ba kane baroh ka dei beit ka kam beaiñ bad lashai ka sngi ngin sa leit ruh ban ïakynduh bad u DC ka Ri-Bhoi ban pyrshah jur ïa katei ka Night Club, la ong u Bah Jayson.
Ka seng ka kyntu ruh ïaka Dorbar Shnong ba ka dei ban weng noh mardor ïa katei ka NOC bad kumjuh ruh ïaka bor district ba kam dei ban ailad ïaki kam beaiñ ban ïaid hapoh ka district.