La shu maramot ïa ka surok AMPT khlem da ïaid katkum ka jingstad saïan, kynnoh u Safior Rahman

By Mawphor Editor On Jul 14, 2025

Shillong, Naitung 13: U MDC barim ka Garo Hills Autonomous District Council (GHADC) u Sofior Rahman u la pynrem jur ïa ka jingmaramot ïa ki thliew ki syar jong ka surok AMPT hapdeng ka Phulbari bad Rajabala, u la kynnoh ba la pyntrei khlem da ïaid katkum ka jingstad saïan bad ka rukom trei ruh ka long kaba pohdor.
Kane ka jingmaramot, kaba kynthup ka jingtheh ïa ka khyndew, ka ktieh bad ki maw ha ki thliew surok khlem da ïaid katkum ka rukom ba la khmih da ki engineer, nangta ka jinglong skhem ne ka jingsiang rong ha kaba kane ka la pyndap da u pui pui khyndew ha baroh shi lynter jong ka surok bad ka jingshah riam ki kali ha ka ktieh ha kaba kane ka la wanrah ka jingeh ïa kiba ïaid lynti.
Kane ka jingmaramot ïa ka rukom kaba la pyntrei khlem ka jingstad saïan ka la ktah bha ïa ka koit ka khiah ki nongshong shnong.
U Rahman u la ong ba ka jingïaibteng ban ïaid ki kali ka la pyndap bad pynrben ïa ka surok da u pui pui, ha kaba kane ka la lam sha ka jingshem jingeh ban ring mynsiem, ka jingïoh pang asthma, bad allergy. Kiba ïaid lynti bad khamtam ki khynnah ki la ïoh ka jingpang na ka jingdait ki khmat bad kiwei ki jingshah ktah. Ka jingsniew palat ka surok ka la ktah ïa ki nongrep, ki nongkhaïi bad ki nongshong shnong kaba la wanrah ka jingpynslem ki kam ki jam bad ki jingsngewkhia halor ki lad jingïada.
Halor kane u Rahman u la dawa ba dei ban pynsangeh noh mardor ïa kane ka kam maramot ïa ka surok kaba khlem ïaid katkum ka jingtei ka stad saïan.
U la pynpaw ruh ka jingdonkam ban pynbiang ïa ka jingkheiñ jingdiah kaba khuid bad kaba shai pura haba ïadei bad ka jingmang pisa, ka jingkhot tender, ka jingpynithuh ïa u ne ka contractor, bad ki ophisar kiba batai kam bad ban pynlong ruh ki jingjurip ba bniah halor kane ka jingmaramot ba thurmur bad pohdor ïa kane ka surok.
Katkum ka jingong jong u, ka PWD (North Division), Tura, ka dei ban shim ka jingkitkhlieh ba ka la pulom ban shim kam wat hapdeng ki jingïaibteng ban ujor na ka por sha ka por.
Lada kam don kano kano ka jingshim kam, u Rahman u la byrngem ban pynlong da ki jingïakhih paidbah bad ban aiti ïa ki jingujor hakhmat ka State Vigilance Commission and Anti-Corruption Bureau.