La shu leh khlem pyrkhat sani bad pynbun palat ki Pulit, ong ka report jingtohkit

Shillong, Nailur 09: Ka Kaiphod kaba la wanrah da ka sorkar mynta ka sngi ha Ïingdorbar Thawaiñ halor ka jingshah siat ïap ïa u Bah Cherishterfield Thangkhiew,ka la lap ba ka daw kaba la poi shaduh ka jingshah siat ïa une u nongïalam barim ka HNLC, kadei ka jingleh kaba khlem pyrkhat bha bad ka jingpyndonkam palat ïa ka bor da ki Pulit.
Kane ka Kaiphod jong ka jongtohkit da u Nongbishar T. Vhaipei, kaba la wanrah da u Myntri Rangbah ka jylla, u Conrad Sangma ha ka sngi ba sdang ka dorbar synrai, ka la pyndam noh ïa baroh ki kyrteng jong ki Pulit kiba la leit khynra ha ka ïing u Bah Cherish bad kumjuh ruh ïa ki kyrteng jong kito kiba la leit sakhi hakhmat ka Commission of Inquiry.
U Nongbishar Vhaipei ha kane ka jingtohkit jong u, ula khot sakhi ïaki Pulit kiba la leit khynra ha ka ïing u Bah Cherish kata hapdeng ka miet jong ka 12 bad 13 tarik u Nailar ka snem 2021.
Ka jingtohkit ka lap ruh ba ki Pulit ki la buddien bha hadien ka jingpynbthei bom IED ha Khliehriat bad ha Laitumkhrah bad ïa ka jingïoh jingtip ki Pulit Syntiat ba ka don ka jingthmu ban pynbhei bom IED biang ha ka 13 haduh ka 15 tarik u Nailar 2021.
La ïathuh ba ka jingtohkit bad ka jingsyntiat ka lap ïa ka jingdonkti u Bah Cherish bad kine ki jingpynbthei bom, ha kaba ka HNLC ka la kam ba ka pynbthei ïa kine ki bom ki kdew shai ïa ka jingïadon kti u Bah Cherish. La lap ru ha ka jingtohkit ba u Bah Cherish u la pyndonkam da ka kyrteng Sanbor Pala ban dawa pisa bad bthah kam ïa ki briew ha ka jingpynbthei bom.
Kumta ki Pulit ki la pynlong ïa ka jingïalang ha ka miet jong ka 12 tarik u Nailar 2021, ha kaba la rai ban leit khynra bad ban kem ïa une u nongïalam barim ka HNLC. Hadien ba kane ka jingïalang ki heh Pulit ki la ïoh lut ïa ki jingtip ba u don ha ïing ha Mawlai Kynton Massar, la thaw ïa ka kynhun ki Pulit ki ban leit sha kane ka Operation bad la bthah ban kem im ïa u. Hynrei ka report ka ong ba ki Pulit kiba la shah ring ban ai sakhi kim kynmaw la ka la don nem ka jingbatai bniah ban kem im ïa u.
Kumta ha ka por 2.55 mynstep jong ka 13 tarik u Nailar kane ka kynhun ki Pulit ka la poi ha ïing u Bah Cherish. Ka kynhun kaba nyngkong ka la rung nyngkong da kaba rung da ka khytdop bad tied ïa ka jingkhang bad pyrta ruh ïa u Bah Cherish ban mih shabar namar bala kerkut da ki Pulit. Hynrei ym shym la don ba thie ne jubab na ka ïing u Bah Cherish, wat lada ki la pyrta bunsien. Kumta ki la rung jubor na ka jingkhang bah jong ka ïing jong u. Ha katei ka por ba ki leit ka don ka jinghap slap tangba kam da jur bad ka ïing ka dum tliw tliw namar la pyllip ïa ka bor ding elektrik. Ong ki Pulit ba rung nakhmat ba ka don ka lynti ïaid da ki maw lynti bad poi sha kaba kham kyndong. Hamar katei ka por uwei u Pulit SOT uba la rah da ka suloi AK-47, hapdeng ka jingdum u la ïohi ba don mano re ba tur shajan jong u da kaba hylla bad byrngem., Une u Pulit u la pyrta ïa une uba tur sha u ban sangeh bad pyrta ruh arsien lasien..sangeh .sangeh. Hynrei une u briew um shym la sangeh bad hamar ba u la jan poi sa kumba ar ne lai phut shajan jong u, une u Pulit u la siat shi kuli ba ki bynta kiba shapoh ka met une u briew da ka jingthmu ban ïada ïalade. Une u briew u la kyllon khram ha madab. Hadien kane ki la pynmeh ïa ka ding elektrik bad la ïohi ba une uba kyllon ha madan udei u Bah Cherish bad ka tari ka don hajan jong u.
Ha ka por ba pynmeh elektrik, la ong une u Pulit u Bah Cherish u dang im bad la don ki Pulit kiba la wan lang ki la phone sha ka Ambulance 108 bad rah noh ïa u Bah Cherish bad kane kadei ha ka por 3.05 mynstep, kaba mut ba kane ka operation ban leit kem ïa u Bah Cherish kaba la kylla sha ka jingsiat ïap hadien ka shim por tang kumba 10 minit eiei. Ka Ambulance ka la poi haduh ka por 3:40 mynstep, kaba mut ba ka la shimpor haduh 35 minit eiei hadien ka jingshah siat u Bah Cherish ban poi ha katei ka jaka ba jia ka jingsiat.
Kiwei pat ki Pulit kiba leit lang ki la ïathuh hakhmat ka jingtohkit ba ha katei ka ïing la don lang ruh arngut ki briew kiba hadien ba la lap ba kidei ki khun jong u. Sha ka mala kaba shapoh pat la thiah ka lok jong u Bah Cherish.
Nalor ba ka jingtohkit ka la lap ba ka don ka jingtreikam kaba khlem pyrkhat sani bad ka jingpyndonkam bor ki Pulit, ka la lap ruh ba ki Pulit kim don ïa ki Night Vision Device ki ban ïarap ïa ki Pulit ban ithuh ha ka por ba ki leit khynra ha ka por mynmiet. Nangta kim shym la tah ruh ki torchlight, ïa kaba ki Pulit ki ong ba kam long kaba bha ban rah torch light ha ki jingleit khynra kiba kum kine, namar ba ka long pynban ka jingma ïa ki.
Ka Commission ka la ai jingmut ruh ba ha ki jaka sor ba ki jaka ba shong paidbah ym dei ban leit khynra por mynmiet, ïa kaba ki Pulit ki ong ba ki jingkhynra por mynmiet ka shong ha ki jait kam ne ki jait briew kiba hap ban leh ha ka por miet.
Ka Commssion u Vhaipei ka ai jingmut ruh ba haba leit khynra dei ban rah ïa ki tear gas khnang ban lait na ki jingjia ba sngewsih. Na ka liang ki Pulit ki la ong ba kin sa pyrkhat ïa kane bad buh ruh ki kyndon kiba bniah ha ki jingkhynra kiba kum kine.
Ha kaba ïadei bad ka jinglap ka jingtohkit ba ka jingkhynra ka long kaba khlem pyrkhat bha bad pyndonkam da ka bor, na ka liang ki Pulit ki ong ba kin sa pan jingpynshai na ka kynhun kaba nyngkong kaba don kti ha kaba shim ïa ka jingim u Bah Cherish.