La shu aibor lut na khlieh ha kjat ïa u Panah, shah die ki khun trai : Bah Prestone

Shillong, Nailur, 04: U National Vice President jong ka National Peoples Party (NPP) u Bah Prestone Tynsong u la siat pharshi ïa ki nongïalam ka United Democratic Party (UDP) kat haduh ba u MLA barim jong ka party u Bah Embhalang Syiemlieh lem bad ka kynhun ki la hap ban mih noh na ka UDP.
Ha ka sngi janmiet sngi Saitjaiñ jong ka taïew balade, ïa u Bah Embhahlang B. Syiemlieh bad ïa ka kynhun jong u la pdiang burom sha ka National Peoples Party (NPP) ha kaba la sakhi lang da u National Vice President ka NPP u Bah Prestone Tynsong, u State President u Dr. WR Kharlukhi, u Working President u Prof. Donkupar War, u MDC ka Mawlai Constituency u Bah Teiborlang Pathaw, ki nongïalam ka National People’s Youth Front (NPYF), u MDC ka Rambrai u Bah Bajop Pyngrope bad kiwei kiwei.
U Bah Tynsong haba pdiang sngewbha ïa u Bah Embhah bad ïa ka kynhun sha ka NPP u la ong, “phi la long u dkhot bapura jong ka party. Kynmaw tang kawei, ym don barim ym don ba thymmai. Tengteng ka don ka jingsngew, nga u riewrim, utai uba dang thymmai, hynrei Bah Teibor sngewbha wat ailad ïa kata.”
“Haba ngi la ïalong kawei ka mut la ïalong kawei, ngi ladep ïasaiñ ki kot ki sla mynta ka miet. Jin lada u Bah Embhah u dang khih ka jingmut jingpyrkhat, 48 kynta mynshwa u dang shah khroh biang ha ka baieid (UDP) ban ym phet na ka party,” la ong u Bah Tynsong.
“La phiel ka plan, namarba u Bah Process T. Sawkmie ruh um pat dei u dkhot jong ka UDP hynrei la shu ai bor lut na khlieh ha kjat ïa u Panah, kan leit long shano, shah die ki khun trai,” siat pharshi u Bah Prestone.
Da kaba ai mynsiem u Bah Embhah bad ïa ka kynhun, une u Bah Tynsong u la ong, “Bah Embhah bad ka kynhun jong phi naduh mynta ka miet phi la dei ki khun trai jong ka party NPP. To ngin ïa trei shitom, nga la ïohi ba la kumno kumno ha u snem 2023 ngin ïoh ïa ka jingjop kaba donburom.”
Haba kynthoh ïa ka jingput turoi jong u MLA ka Mawlai Constituency da kaba pynmih khubor khlem kut sngi, u Bah Tynsong uba long ruh u Symbud Myntri Rangbah uba bat ïa ka tnat PWD (R) ka Sorkar Jylla u la ong, “nga ïohi manla ka sngi mih kotkhubor teng teng ha sla nyngkong bad teng teng sha pdeng sla ïa kaba shu leit jurip shane shatai ïa ki lynti ïaid kjat, ïa ki nala. Shu ong ba la ai surok shane shatai katba ïa ka PWD dang bat hi da u Bah Prestone,” bad bynrap, “hynrei tang khyndiat i kyntien ban ai burom ïa u Bah Prestone ruh em.”
Haba ïa ka jingpynbna ba dan shen jong u MLA ka Mawlai Constituency uba la pynbna ban mang pisa 6 klur duna ka MLA skhim na ka bynta ban shna ïa ki surok ha ki shnong ka Mawlai Constituency, u Bah Tynsong, u la ong, “6 klur hana ngan sei hi na ka MLA skhim.. Ka MLA Scheme kaba ngi ïoh ka long tang 2.5 klur ha ka shi snem. Tang ha kaba ai ïa ki skhim shimet ruh la lut, naei yn dang ïoh shuh ban shna surok.”
“Ka jingkam ei ka shait jia tang ha ka por elekshon. Ngim dei ban ailad ba phin kam ei ïa ka iing ka sem. Phi lah ban kam ei shipor tangba ka jingshisha kan paw,” u la ong.
U la ïathuh ruh hadien ka jingpynïasoh jong u Bah Teiborlang Pathaw sha ka NPP, ki kam pynroi ki la sdang ban paw ha Mawlai Constituency.
“Ka surok ba kongsan tam na Mawlai Umjaiur kaba mih sha Mawlai Motsyiar, ka surok na lynti ïaid kjat na Mawlai Nongpdeng ki dei ki surok kiba kongsan. Nga shu ïathuh lypa ïa phi ïoh don kiba kam ei,” la ong u Bah Tynsong.
U la ïathuh ba ki dang don shuh shuh kiwei pat ki kam pynroi ban pynkylla dur ïa ka shnong Mawlai baroh kawei.
U la ong ruh ba ka jingwan jong ka skhim NREGS ha sha ki shnong ka Mawlai ka long ka jingkyrkhur.
“Ka skhim sam um na ka Jal Jeevan Mission ka bym lah ban ïoh hapoh ka shnong Mawlai hynrei mynta phin ïoh. Ka Water Supply Scheme ha ka shnong Mawiong mynta ruh ka la ïaid shakhmat. Ngi dang donkam ban peit ïa kiei ki Constituency kiba ngi lah ban leh na ka bynta ki paidbah. Ban shu lap miet tang ban ïathoh khubor kam don jingmut,” u la ong shuh shuh.
“U Bah Prestone um ju thoh kot khubor, tangba shisien san snem u tam beit ka vote. Balei ynda hap ban thoh kotkhubor, ai ba ka shnong kaba ïoh jingmyntoi kan tip,” la bynrap u Bah Tynsong.
“Ngi ki nongïaleh elekshon ngi pynbiej laiphew jait ïa ki paidbah, ngi pynbiej manla ka san snem, ki paidbah ruh ki biej manla ka san snem,” ong u Bah Tynsong.