La shngaiñ ki paidbah ban leit ban wan na Jingkieng Dwarksuid ba la dep shna ka Jingkieng ba thymmai

Nongpoh, Jymmang 29: Kumba ha kine ki snem ba la leit noh la mih shibun ki jingïakren halor ka jingbym skhem shuh ka jingkieng Dwarksuid kaba rim hadien ba la lap ïa ki dak orpait hapoh ka jingkieng, hynrei namar ka jingshim khia ka sorkar jylla ki paidbah mynta ki la shngaiñ ban ïaid lyngba katei ka jingkieng kaba dei hadien ba la shna noh da ka jingkieng ba thymmai.
Kum ban pynkynmmaw, ha ki snem ba la dep noh ka sorkar jylla ka la hap ruh ban shna wat ïa ka jingkieng Nar (Bailey Bridge) namar ba la don ka jingma ban ïaid lyngba ka jingkieng barim ba ka sorkar ka la hap ruh ban pynlut tyngka ban shna ïa ka jingkieng nar na ka daw ka jingbym shngaiñ shuh katei ka jingkieng barim, hynrei kane ka jingkieng nar tang shipor ka ai jingshakri ha kaba ka don ka jingthud ha ka leit ka wan ki paidbah, hynrei naduh ba la pyndep ïa ka jingkieng ba thymmai ka ïaid ka ieng ki Kali paidbah ka la ïaid beit ïaid ryntih ba ki la ioh ban pyndonkam da katei ka jingkieng ba thymmai kaba dei hadien ba la ailad ban ïaid noh na kane ka jingkeing ba thymmai kaba la ai jingshngaiñ shibun ym tang ïa ki Kali ba kit khia hynrei ïa ki paidbah ba hap ban ïaid lyngba kane ka jingkieng ha Dwarksuid, Umiam.
Haba kren halor ka jingkieng rim, namar ka jingsator ka jingkieng bad ka jingbym shngaiñ shuh na ki dak orpait hapoh ka jingkieng, ka sorkar jylla lyngba ki bor synshar District ki la dep ruh ba pynjari wat da ka kyndon 144 CrPC ban khanglad ban ïaid ki kali kit khia ha kaba kane ka la buh jingeh shisha ïa ki paidbah, hynrei hadien ba la pyndep noh ban tei da ka jingkieng ba thymmai kane ka la ai jingshngaiñ shubun eh ïa ki paidbah nongleit nongwan bad kam don shuh kano kano ka jingthud ha ka leit ka wan ki paidbah.
Kumba la lap bad sakhi ha ka jingleit jurip u Mawphor, la lap ba tang hadien ba la pyndep ïa kane ka jingkieng ba thymmai, ka NHAI ryngkat ka bor District ki la ailad ban ïaid noh ïa ki Kali ki motor lyngba katei ka jingkieng ba thymmai ha kaba ka leit ka wan ki Kali ki motor wat ki Kali ba kit khia ruh kam don jingthud shuh kumba ki paidbah ki la mad ha ki snem ba la leit noh ba hap ban phirkir haba leit ba wan ka Jingkieng barim,
Shuh shuh, u kumba la pynpaw da u Project Director ka NHAI, u Anand Singh Chauhan, la ong ba ka NHAI ka la shim khia ban phah pyndep kloi ïa kane ka jingkieng bad kane ka jingkular utei u Project Director ka la urlong shisha, ha kaba na ka daw ka jingshim khia ban pynsted ïa ka kam kumba la buh por ban pyndep ïa katei ka jingkieng, ki Company ba pyntrei ki la lah shisha ban pyndep bad ka la pynsuk shisha ïa ki paidbah ha ha ka leit ka wan lyngba kane ka jingkieng ba thymmai.
Kaba sah mynta ka long sa tang ba ka sorkar jylla kan plie paidbah noh ïa kane ka jingkieng ba thymmai ha Dwarksuid hadien ba la ailad ban ïaid noh ki Kali ki motor lyngba kane ka jingkieng ba thymmai.