Nongpoh, Naiwieng 27: Hadien ka jingshah khang jong ki kali kamai ka Meghalaya bad Assam ban rung bad mih ha kaba la shah tang ha Jorabat ban long kum ka jaka pynkiew bad pynhiar passenger, namar ka jinglong jingman bad ki jingïakhih haka jylla bad ka jingbym shngaiñ haka leit ka wan, ki bor pulit jong ka Assam mynta ka sngi kila sdang ban pynlait bad shah biang ïaki kali kamai na Assam ban rung shaka jylla bad kumjuh ruh kiba na Meghalaya ban leit sha Assam.
La sakhi ruh ba ki bor pulit jong ka Assam mynta ka sngi ki pynkhlaiñ ïaki bor pahara ha Jorabat ban peit pyrman ïaka leit ka wan bad kumjuh ruh ban talasi ïaki kali ba rung ba mih shaka jylla Meghalaya bad Assam.
Kum ban shu pynpaw ba ki bor pulit jong ka Assam kila khang ïaka leit ka wan jong ki kali kamai na Assam ban rung sha Meghalaya naka bynta ka jingshngaiñ jong ki hadien ka huri hura bad ki jingïakhih kaba la mih haka jylla naka jingshah siat iap jong 5 ngut ki mynsiem briew haka shnong Mukroh West Jaiñtia Hills.
Dei mynta ka sngi ba ki bor pulit jong ka Assam kila shah biang ïaki kali ban rung ban mih shaka jylla bad ban ailad biang ïaki ban kamai.
Naka liang ki nongñiah kali kila pynpaw ka jingsngewkmen kaba khraw halor ka jingïoh biang jong ki ban leit ban wan bad khamtam ban kamai kumba ju long bad kyrmen ba kane ka kynrum kynram hapdeng ki 2 jylla yn sa lah ban pynbeit noh shen.
