Jowai, Ïaïong 10: Ban wanrah ïa ka bha ka miat jong ka shnong ka thaw bad ka roi ka par ha baroh ki liang, ha kane ka 2 tarik mynta u bnai Ïaïong, 2022 la seng ïa ka ‘Nongtalang Area Development Council’ kaba hap hapoh ka shnong Nongtalang Mission.
Ïa kane ka ‘Nongtalang Area Development Council’ la seng ïa ka da kine ki 13 tylli ki dong/shnong kiba kynthup ïa ka shnong Nongtalang Neiñ, ka shnong Nongtalang Mission, ka shnong New Nonglamin, ka shnong Amsohmeheleng, ka shnong Thmai, ka shnong Katdoh, ka Dong Khlachympa, ka Dong Shnongklor, ka Dong Banan, ka Dong Remmusan, ka Dong Shnongpdeng, ka Dong Tympang Club bad ka Dong Amlariang
Shuh shuh la ïathuh ba kane ka Council kan treikam na ka bynta kine ki mat jingdonkam kata ban peit ban khmieh ïaka roi ka par hapoh ka shnong Nongtalang kum ka Hospital, Bank, Veterinary, ki skul bad kiwei kiwei.
La pynsngew ruh ïa ki rukom treikam jong ka kiba long kumne ka Council kan long tang kum ka nongïarap, ka term ki Nongkitkam kam kan long 2 snem, man ka shisnem yn pynlong ka General Meeting (Dorbar), ki ban don haka Dorbar baroh kin long ki Executive Committee shnong bad Executive Committee Dong,
Ha kane ka juh ka sngi ka Nongtalang Area Development Council kala ïoh ban jied ïa ki nongkitkam jong ka kiba la don 27 ngut baroh na bynta ka snem 2022-2024 kiba kynthup ïa u President ma Twinson Rymbui, Teneyson Rymbui Vice President, Sanborlang Nonglamin General Secretary, Brightstarwel Pohsnem Asst. Secretary, Starwell Paduna, Financial secretary, Kynjaimon Pohtam Treasurer, Adviser ma Batkupar Rymbui bad u ma Min Lyngdoh, Auditor ma Emida-o P.Sohsley bad ma Mandichynnam Tongper, la jied ruh ia ki 17 ngut ki member.
