Shillong, Jylliew 19 : Ha ka jingïakynduh lang ha ka 17 tarik Jylliew 2022, ki nongkilan met bad ki riewkhmat ha ki kam ïalehkai na ki hynriew district ki la ïa mynjur bad seng ïa ka Wrestling Association of Meghalaya, (WAM), bad rai ruh ban buh ïa ka ophis treikam ha Nongbah Shillong.
Ha katei ka jingïalang la rai ruh ban pdiang ïa ka riti trreikam (Constitution) kaba ïa syriem bad ka riti pynïaid kam jong ka Wrestling Federation of India.
Ka jingïalang ka la rai ban pan ïa ka jingithuh na ka Wrestling Federation of India, bad na ka Meghalaya State Olympic Association, bad na ka Department of Sports and Youth Affairs jong ka sorkar jylla kum shibynta ban kyntiew, pynshlur bad pynlong ïa kane ka jingïalehkai ïalympat (Wrestling) hapoh ka jylla.
Ka Wrestling Association of Meghalaya, ka la rai ruh ban pynlong noh shen ïa ka coaching bad training camp da ka jinghikai ba la kular na ka Wrestling Federation of India.
Ha katei ka jingïalang la jied ïa u Bah John F Kharshiing kum u Presdient jong ka Wrestling Association of Meghalaya, Vice President Bah Ralden Shabong, Vice President Bah Coverfield Marngar, General Secretary, Bah Sunny P Dkhar, Assistant General Secretary (ar ngut) Bah Rissanwell Lajong, Bah Reggiful Thongni, Treasurer Bah Johnny Nongrum, bad khadwei ngut ki dkhot Executive Member.
Kitei ki kynthup ïa u Bah Khrawpyrkhat Rashir, Bah Androney Wahlang, Bah Bines Sohshang, Bah Laitbha Wahlang, Bah Kynsai John Nongsiang, Bah Chesterwell Kharbani, Shri. Dipulin Marak, Bah Rangdajied Kharumnuid, Bah Sambormi Lyngdoh, Bah Donbestar Syiemlieh bad Bah Cores Marweiñ.
Ka synjuk la ka la shim ruh ka rai ba lada don ka lad ban pynrung ïa ka jingïalehkai ïalympat hapoh North East Olympic Games kaban sa long ha u Risaw 2022 kum shibynta ban ailad ïa ki nonglympat jong ka jylla ban ïoh ban sei ïa ki sap ba kyrpang.
