Shillong, Jylliew 12 : Ka Deputy Commissioner jong ka East Khasi Hills, Kong RM Kurbah ka la ong ba ka ka jingpynbna ïa ka ïaid Odd/Even number na bynta ki kali kamai kumba la bthah da ka High Court ha ki ar tylli ki bynta jong ka nongbah, ka la wanrah mynta ïa ka jingkylluid ha nongbah Shillong.
Haba kren bad ki lad pathai khubor, ka DC ka la ong ruh ba katkum ka jingbthah jong ka Iing Bishar la kdew beit tang ar tylli ki jaka, kata tang ka Khyndailad bad Motphran.
“Nga khlem ong ba ka jingpyntreikam ïa ka Odd/Even number kan treikam ha baroh kawei ka nongbah hynrei kadei beit tang ha kitei ki jaka ba la kdew namar ka jingkhapngiah ka jaka. Kumta ka hukum ruh la pynmih bad ngi la ïohi ba kane ka la ïarap ban tehlakam ïa ka dheng kali,” ka la bynrap shuh shuh.
Shuh shuh ka la ong ruh ba ki bor distrik kin sdang talasi naduh mynta ka taiew ïa kino kino kiba leh pyrshah ïaka rai ban pyntreikam Odd/Even kaba la treikam naduh 5 tarik mynta u bnai.
“Ngi khlem pyrkhing than haba ïadei bad ka jingpyntreikam ïa ka hukum namar nga la ïoh pdiang ïa ka shithi ba ki dribar kin leit ban ujor sha ïing kashari halor ka hukum. Nga dang ap ïa kano kano ka jingbthah ka ban mih hynrei mynta ka taiew ki bor district kin sdang ban talasi.” Ka la pyntip ruh ba la shai ka sngi ki bor distrik kin leit ban pyntikna ba katei ka jingpyntreikam kan pynkylluid ïa ka dheng kali.
Hadien ba la mih ka jingud na ki paidbah ba dei ban pyntreikam lang ïa ki kali jong ki riewshimet ba kin ïaid Odd/Even, ka DC ka la ong ba katkum ka kaiphod wad bniah bala pynlong da ki bor district, la shem ba ki kali shimet kim don bynta ban pynsahkut ïaka leit ka wan ki kali ha kine artylli ki jaka namar kim ju sangeh.
