Shillong, Naiwieng 06 : Ka Hima Khyrim kaba ju pyndep man la u snem ïa ka niam ka rukom ha ryngkat ka duwai ka phirat bad ka shad ka kmen kaba la ju tip kum ka Pomblang Syiem ne Shad Nongkrem ka la sdang da ka Pomblang Ïewduh ha ka sngi Palei kaba dei ka sngi Ïewduh katkum ka rukom kheiñ sngi tynrai u Khasi.
Ha kane ka sngi sdang jong ka Shad Nongkrem, kaba kham kongsan ka jinglehniam ka dei ka jingpom ïa u blang ha u Lum Pomblang Ïewduh kaba dei ka jaka kaba la pynkhreh kyrpang ban pyndep ïa ka kñia ka khriam ban pom ïa u ‘Lang Nyngkong da uwei na ki Duhalia.
Hadien ba la dep pom ïa u ‘Lang Nyngkong uba kynsai, ka bud sa ka shad ka kmen ha kane ka jaka ha kaba u Syiem Khynnah ruh u ïashimbynta lang lem bad u Syiem ka Hima Mylliem.
Ka Pomblang Ïewduh ka dei ka bynta kaba kyrpang ha ka niam ka rukom ka Hima Khyrim bad ki don bun rukom ki jinglehniam hashwa jong kane ka sngi kaba la sdang naduh ka sngi Pomtiah bad sngi Umni.
Ha ka sngi Ïewduh kaba dei ka Pomblang Ïewduh, la pyndep nyngkong ïa ka niam ka rukom ha Ïingsad nalor ka shad tynrai ha phyllaw Ïngsad kaba la ïashimbynta tang khyndiat ngut ki nongshad shynrang.
Ynda la nohphai sngi, hashwa ban mih na Ïngsad da ka kjat ban leit sha u lum Pomblang Ïewduh ban pyndep ïa ka kñia ka khriam, u Syiem u sam shwa ïa u kwai bad ai ha ki Duhalia.
Ha ka por ba mih ban ïaid kjat, ki nongshad tynrai ki lam nakhmat, ha ryngkat ka jingriew ka bom ka ksing bad ka tangmuri ha kaba ïaid lang ka longkmie kaba kit ïa ki tiar lehniam ha ka khoh ba la dong da ka trap. Ka longkmie kaba kit ïa ka khoh kaba don ki tiar lehniam, ka ïaid beit khlem phaidien naduh ba mih na Ïingsad tad haduh ban da poi ha u lum ba pynlong ïa ka lehniam Pomblang Ïewduh.
Hashwa ban poi ka sngi Ïewduh, ka lehniam jong ka Hima Khyrim ka sdang da ka suit dohkha bad ka ïabam ‘khapiah hapoh Ïingsad ha ka miet Pomtiah ha ryngkat ka suit ka shor bad nguh ka dem na ka bynta ka bha ka miat ka Hima bad ki khun ki hajar ryngkat ka jingpynriew ïa ka bom ka ksing.
Ka nguh ka dem ka sdang naduh ka janmiet jong ka miet Pomthiah bad bteng haduh shiteng synïa kum ka jingsdang ïa ka nguh ka dem. Haba ïabam ‘khapiah hapoh Ïingsad, la tah lang tang da ka mluh bad u sying.
Hadien ka Pomtiah, ka wan sa ka sngi Umni bad ka don biang ka suit ka shor bad bam ‘khapiah hapoh Ïingsad shisngi shwa ban poi ka Pomblang Ïewduh.
Ïa kine ki jinglehniam hapoh Ïingsad ha ka sngi Pomtiah bad Umni, hashwa ban poi ka sngi Ïewduh bad sngi Lyngka, ym ju lah ban sakhi lang ki paidbah.
Hadien ka Pomblang Ïewduh, ka ju bud sa ka shad ainguh ha phyllaw Ïingsad ha Smit, kata, ha ka sngi Lyngka kaba ju tip ruh kum ka Pomblang Lyngka.
Ha kane ka sngi Lyngka, ka don ka jingshad tynrai kaba la ju ïashimbynta lang da ki nongshad shynrang bad nongshad kynthei nalor ki khun Syiem ha ryngkat ka riam tynrai lem ki khor ki khriam kaba pynphuh pynphieng ïa ka sngi Lyngka kaba dei ka sngi pynkut ïa ka Pomblang Syiem.
Ha ka por janmiet ynda la pynkut ïa ka shad, yn pyndep sa ïa ka duwai ka phirat bad ynda la dep pynbit pynbiang, ka bud sa ka jingpom ïa ki blang kiba la wanrah da ki Raid bad Shnat Raid bapher bapher jong ka Hima Khyrim.
U Syiem Khynnah u ju lamkhmat ban pom ïa ki blang ha kane ka sngi kyrpang bad ha ka por ba pom ïa ki blang, la ju siat suloi sha suiñ.
Ïa ki blang kiba la wanrah da ki Raid bad Shnat Raid jong ka Hima Khyrim, ka ju don ka lehniam kaba tip kum ka Bujai Blang kaba ju pyndep ha ka step synïa jong ka sngi Lyngka.
