Shillong, Nailur 25 : Ka lympung ïalehkai phutbol kaba nyngkong jong ka North East Pride Cup ka la sdang ha ka sngi Saitjaiñ ha Nongbah Shillong. Ïa ka NEPC la pynlong ha kylleng ki jylla jong ka thaiñ shatei lam mihngi ka ri India ha ka jingïatreilang ryngkat ka Assam Don Bosco University.
Ha Nongbah Shillong ïa katei ka lympung la plie pyrda da u Dr. Lajja Ram Bishnoi uba dei u DGP ka Meghalaya bad u Brig Surender Sharma, HQDGAR ha madan ïalehkai phutbol jong ka Assam Rifles.
Ka jingïalehkai kaba nyngkong ka la long hapdeng ka Sakat FC bad St John’s School ha kaba ka Sakat FC ka la jop da 5-1 kol.
Ïa katei ka tournament la pynlong ha ki 22 tylli ki bynta jong ka NE India ba kynthup ha 4 tylli ki jaka ha Meghalaya kata ha Nongbah Shillong, Mairang, Tura bad ha Jowai.
Ka jingïalehkai kaba bud kan long ha Mairang ha ka 29 tarik bad 30 tarik Nailur. Ïa ka jingpynrung kyrteng na bynta katei ka tournament ki kynhun ki lah ban pynrung kyrteng tïalade ha ka website www.northeastpridecup.com.
