Ki khubor kiba la mih ha kine ki sngi, khamtam ka jingpynpaw ka na ki katto katne ki nongialam ka UDP ka pyni ba ka Seng NPP bad ka UDP ki la sdang ban iaphoi hadien ka jingiatreilang kaba la neh palat saw snem. Kane ka jingiadei ka long lyngba ka jingiatreilang ha ka sorkar Meghalaya Democratic Alliance (MDA). Ka NPP bad ka UDP kidei ki artylli ki Party ba heh duh ha ka MDA bad dei ma ki, kiba pyniaid ia ka sorkar jylla, namar kidei kiba don bun ki Myntri ha ka kynhun Myntri.
Hynrei,m hato kane ka jingiaphoi kadei kaba da don shisha na ka shapoh ne kadei kaba shu paw tang na shabar na ki katto katne ki nongialam jong ka Seng?. U Dr. Jemino Mawthoh bad u Bah Bindo M. Lanong, kiba long ki arngut ki nongialam jong ka Seng UDP, ki la pynpaw ka jingbynhun ia ka jingiatreilang bad ka NPP, tangba kim kwah pat ban weng jingkyrshan na ka sorkar namar ba ki sheptieng ioh wan ka President’s Rule. Kine ki nongialam ki la ong ba lada wan ka President’s Rule ha ka jylla, ka sorkar pdeng ka lah ban pyntreikam ia ki ain katba ka mon, khamtam ia ki ain ki bym iahap bad ka jylla Meghalaya.
Hynrei u nongialam ka NPP, u Bah Prestone Tynsong, uba long u National Vice President ka NPP, u la ther kylla ia kane ka jingtieng ka UDP ia ka President’s Rule. U Bah Tynsong u kop ruh ba lada dei ma u ha ka jaka ka UDP, ym nym da ap bun sngi ban weng na ka sorkar MDA, hynrei tang hapoh shi sngi arsngi u la weng beit lada u lap ia ka jingbymtreikam bha ka sorkar MDA hapoh ka jingialam ka NPP, ioh ba ka poi sha kaba kham sniew shuh shuh.
Halor ka jingpynpaw ka UDP ia ka jingtieng ia ka President’s Rule, ki paidbah ki kynmaw tharai ba kam dei ba ka Meghalaya kam pat ju mad ia ka jingsynshar u President ka ri lyngba u Lat ka jylla. Hynrei ha ka snem 2009, ha ka por ba ka UDP ka ialam ia ka jingsynshar lyngba ka sorkar MPA, ka la don ka jingphet noh ki katto katne ki paralok ba iatreilang ha ka MPA bad ka sorkar ba ialam ka UDP ka la kylla rit paid noh. Ka sorkar pdeng ha katei ka por ka UPA ba la khlieh da ka Congress ka la pynjari da ka President’s Rule ha Meghalaya.
Pynban ha ka por ba don ka President’s Rule ki paidbah ki la iaroh ia u Lat ka jylla, u RSMooshahary, man la ka sngi, u la leit jurip ia ka jingtreikam ki ophis sorkar ha nongbah Shillong bad ki paidbah ki la kmen namar ba ki nongtrei sorkar ki la hap ban shakri bha ia ki paidbah. Ki la hap ban wan biang por bad mih biang por na ophis, kaba mut ka work culture kaba ki nongtrei sorkar kidei ban don ban pynsuk ia ki paidbah ka la treikam bha ha katei ka por.
Nangta ka surok kaba kiew sha Khlieh Iewduh, kaba la jot rathai, kaba ym ju don mano mano ba peit mano mano la pyntrei bad siang rong. Naduh katei ka por ba siang rong ha ka por jong ka Presient’s Rule mynta la 13 snem, kane ka surok ka sah kumto bad wat lada ka la jot biang ruh ka tnad PWD kam shym la peit satia, lait noh tang haduh ka jaka ba iaid ki shipai ladep siang rong ha kine ki bnai baladep.
Haba phai biang sha ka jingiadei ka UDP bad ka NPP, ym tip la kadei kaba mih na ka Seng baroh kawei ne kadei kaba shu mih na ki katto katne ki nongialam. Namar dang ha u snem baladep, haba la mih ka jingbymiaid beit ha ka jingtreikam ka tnad bording ha katei ka por ba dang bat u James K. Sangma ka UDP, ka la dawa hiar shuki ia u James. Hynrei ha ka sngi kaba bud ki MLA jong ka UDP ki la kyntait ba kadon ka rai kaba kum kata bad na ka liang jong ki, ki la pynpaw ba kim tip eiei. Niuma hadien katto katne bnai, u James u la shah knieh noh ia ka tnad bording bad la shimti noh da u Bah Prestone Tynsong.
Kumta wat kane kaba la pynpaw mynta ruh ym lah ban ong pura ba kadei kaba mih na ka Party hi baroh kawei. Ka lah ban dei kaba pynmih tang na ki katto katne ngut ki nongialam khamtam haba la mih ka jingbitar na ka liang ki paidbah ia ka jingtwa ka tnum pyllum ha ka iingdorbar ba dang tei thymmai ha Mawdiangdiang, namar ba u President ka UDP, udei ruh ha kajuh ka por u Lamphang ka iingdorbar.
Sah satang khyndiat bnai ban poi ka elekshon, u paidbah un dang sngewtynnad ban peitkai ia ka drama hapdeng ka UDP bad ka NPP namar kine baroh artylli ki Party kin iaknieh ia ka jingsynshar ha ka jylla hadien ka elekshon MLA 2023, kata kumba ka paw mynta. Tangba ym tip pat kaei kaban jia hadien ka elekshon 2023, namar baroh ka shong ha ka jingstadu paidbah nongthep vote, kam shong ha ki Party ba iakhun ia ka elekshon.
