Jowai, Jylliew 27 : Ïa ka Skill Mela ba ar sngi lynter ba la pynlong da ka sorkar jylla lyngba ka Meghalaya State Skills Development Society la wan ban plie mynta ka sngi da u kongsan u ma Wailadmiki Shylla uba dei u MLA ka Jowai Constituency, ha Kiang Nangbah Govt. College Jowai.
Hashwa kane la don ka jingïalang ba la pynlong ha Auditorium jong katei ka College ha ka jingïadonlang ka Additional Deputy Commissioner, kong DD Syngngai, u MDC ba shusieh ma O. Lamin, Executive Director of the MSSDS, Shivansh Awasthi, ka Principal jong ka College ka Dr. E.M. Blah nalor kiwei de kiba la shah khot sngewbha.
Ka thong jong ka sorkar India lyngba ka Ministry of Skill Development & Entrepreneurship kaba ïadei bad ka MSSDS kan ïarap ïa ki samla pule ba kin ïoh jingtip kham bniah ha kaba ïadei bad ki rukom pule (Training) ki ban kham suk ïa ki ba kin ïoh kam ïoh jam, kumjuh ruh shaphang ki kam khaïi pateng, ka rukom pynïaid ïew ïa ki mar, ka rukom pynmih ïa ki mar rep, ki kam ri jingri bad kiwei de.
U ma Wailad haba ai jingkren ula kyntu ïa ki samla ba kin long kiba mihnot thop ha kano ka kam bad ki dei ban don tang da kawei ka jingmut ym da pyrkhat bunjait eh ïa ki kam, u kyntu ba ki dei ban pyntbit bha ïalade ban long kum u nonghikai (master) bad ha ka juh ka por kan ïarap ban ai kam ai jam ïa kiwei de.
U kitbok ba kane ka jingwan ka Skill Mela ba ar sngi lynter kan long ka jingkyrkhu ba ka bynta ka lawei jong ki khun samla ba kin ïoh jinghikai ban nym pyrkhat tang ha ki kam sorkar hynrei ki dei ban ïeng hala ki jong ki kjat da kaba ïaid ryngkat bad ka jingstad jong ka juk ba mynta.
Ula ïathuh ruh hapoh ka jylla ki don shibun ki kam kiba dei ban trei da ki trai jylla, kumba long mynta kiba bun ki bar jylla ki la peit khmat shapoh kane ka jylla, kumta u kyntu ba dei ban shim ïa kine ki kam kiba don hapoh ka jylla, namat wat ki seng bhalang kiba dawa jur na ka sorkar ban pynteikam ïa ka ILP.
La ïathuh ba ka Meghalaya ka dei kawei na ki hynriew tylli ki jylla kiba la shah jieh ban ban ïoh ïa kane ka skim lyngba ka Skill Acquisition and Knowledge Awareness for Livelihood Promotion (SANKALP).
Ha kine ki san snem ban wan ka sorkar kan kham pynkiew shuh shuh ïa ka rukom ïa jinghikai ïa ki samla haduh 1.2 lak, na ka liang ka sorkar jylla kala ai training haduh 34 tylli ki seng hapoh ki shnong kiba don haduh 14 tylli ki lad ai jinghikai (Sectors), kiba don 35 ki Trades ha ki 44 ki Training Centers hapoh ki 12 tylli ki District jong ka jylla.
Ha kane ka sngi la don haduh 45 tylli ki Stall, kiba kynthup ïa ki stall ai jinghikai shaphang ki laiñ pule puthi bad ki stalls kiba pyni ïa ki mar rep lyngba ki kynhun treimon shngewbha kiba don na kylleng ki jaka Khasi bad Jaiñtia bad kane ka Skill Mela yn pynkut lashai ka sngi 28 tarik.
