La sdang ïa ka jingpynsngew paidbah jong ka Delimitation Committee JHADC na Amlarem 

Khliehriat, Naitung 08 : Ka Delimitation Committee jong ka Jaiñtia Hills Autonomous District Council ka la sdang ïa ka jingpynsngew paidbah na shnong Amlarem ha kaba ïa kane ka prokram la pynlong ha Syiem jingsuk Parish Hall Amlarem, West Jaiñtia Hills District, kane ka public hearing ne jingpynsngew padibah ka ïaid beit ïaid ryntih haduh da kut bad kane ka dei na ka bynta ki lai tylli ki MDC Constitueicy jong ka Jaintia Hills Autonomous District Council ba kynthup ka War East, ka War West bad ka War Central constituency.

Ha ka jingpynsngew paidbah ki riew rangbah kiba la ai jingkren ki la pynpaw la ki jong ki jingsngew jong ki, u Waheh Shnong jong ka shnong Umladkhur, u bah Dapoi Lyngdoh u la ong bad pynsngew ba ba u kwah ba ka MDC Constituency kan long biang kumjuh hi kumba ju long mynshwa ba kane ka shnong kan dang neh bad ka Jowai West Constituency hi, kumjuh ruh u waheh shnong jong ka shnong Pdengkarong, u bah Kolmen Pohshna u pynpaw ba  ki paidbah jong ka shnong Pdengkarong, Amsyrwai bad  ka Amralang ki dang kwah hi ban dang neh bad ka War East Constituency.

  U bah P.Pakyntein uba na ka shnong Pdengshakap u la ieng bad ai jingkren kum ban shu ai jingmut ban ïa ka committee ban wanrah lang ïa ka shnong Pdengshakap,  ka shnong Satpator bad ka shnong Trangblang ban long ha kajuh ka constituency kumba kine ki lai tylli ki shnong ki don ha kajuh ka elaka Satpator, u bah Emlangki uba na ka shnong Umladkhur u la ong  ban kynthup biang ïa ka shnong Umladkhur hapoh ka Jowai South, kumjuh ruh u bah Donbok Lamurong ruh u pynpaw ba u kwah ba ka shnong Thangbuli kan dang neh biang bad ka Jowai South.

  Na ka liang u Assiatant Waheh Shnong jong ka shnong Bakur, u bah A.Khonglah u la pynpaw ba u kwah ban dang neh bad ka War West bad ong ba ka long kaba sngew shem shitom ban rung  sha ka War Central.

U Waheh Shnong jong ka Amlarem, u bah Kampher pohlong, u la ong ba na ka liang jong u kum u waheh shnong u hap ban shim ïa ka jingsngew jong ki nongshong shnong la ka dei ban neh ha kajuh ne ban pynkynriah noh.

  Na ka liang ka Delimitation Committee ka la ai por ïa ki paidbah ba kin phah da ka jingthoh sha ka committee bad ïa ki jingthoh yn pdiang haduh ka 3 baje janmiet jong ka 19 tarik mynta u bnai naitung 2024.

 La pynkut ïa kane ka jingpynsngew padibah da ka jingkren ai khublei na u bah P.Shylla, uba dei u Secretary jong ka Delimitation Committee JHADC.

  Na ka liang ka committee kan nang ïai bteng ïa kane ka jingpynsngew paidbah sa ha ka 9 tarik u naitung bad yn pynlong ha District Library, Jowai bad kane kan dei na ka bynta ka  Amwi-Khliehtyrshi,  Mukhla-Ummulong,  Moodymmai-Nongkroh, ka Wahiajer-Kyndong,  Moodop-Umladang, Mynso-Nongjngi, ka Mynsangat-Khanduli,  Shiliangmyntang-Namdong,  Barato- Mukroh,  Mowtyrshiah-Saphai,  Sahsniang-Mowkaiaw,  Raliang,  Shangpung,  ka Jowai-North, Jowai-Central bad  Jowai- South Constituency.

  Ha ka public hearing jong ka 11 tarik naitung 2024 ka ban long ha Khliehriat West Comminity Hall, East Jaiñtia Hills District, kan dei na ka bynta ka  Muthlong-Sohkymphor,  Tuber,  Musniang-Rangad,  Rymbai-Khliehriat,  Sutnga-Narwan,  Sutnga- Nongkhlieh,  Sumer,  Saipung-Nongkhlieh,  Narpuh bad ka  Bataw-Lakadong Constituency.