La sdang ïa ka jingleh niam Behdeiñkhlam kaba heh tam jong ka Seiñ Raij Tuber bad la sawa ki sur tynrai ba bang

Khliehriat naitung 19: Ka jinglehniam Behdeiñkhlam jong ka Sieñ Raij Tuber kaba saw sngi lynter ka la sdang mynta ka sngi ba ar bad yn pynkut ha ka 22 tarik mynta u bnai, sa shien pat la sakhi bad iohsngew biang ïa ka jingsawa ba thiang jong ki ksing, ki nakra, ki sur tynrai ba bang ha baroh ki shnong ki thaw kiba hap hapoh ka Sieñ Raij Tuber, kata hadien kito snem ba la wan lynshop ka khlam covid-19 ïa ka ri bad ïa ka pyrthei baroh kawei.
Katkum ka jingiathuh ki rangbah jong ka niam tre kiba hap hapoh ka Seiñ Raij Tuber, la ong ba ha kane ka sngi ba sdang ka jingleh niam, ki shnong kiba hap ha ka phang wah ki la leit kiew sha ka phang neng bad pyndep ïa ka jingleh niam ha ka iïng u Lyngdoh ha Tuber bad kumjuh ruh ha ka sngi kaba bud, ki phang wah kin hiar sha ka phang neng bad kine ruh kin hap ban pyndep shwa ïa ka jingleh niam ha iïng u Lyngdoh ha Tuber.
Kum ban shu pashat jingtip, ha ri lum Jaiñtia ki don haduh hynñiew tylli ki jingleh niam Behdieñkhlam kiba dei jong ki hynñiew tylli ki Seiñ Raij bad ka Behdeiñkhlam jong ka Sieñ Raij Tuber kaba haka lympung ha Ait-nar ha shnong Tuber Kmaishnong, East Jaiñtia Hills District ka dei ka lympung kaba heh tam.
Kat kum ka jinglum jingtip jong u Mawphor shaphang ka jingleh niam Behdeiñkhlam jongkitei ki hynñiew tylli ki Sieñ Raij kiba leh ïa kane ka jinglehniam Behdeiñkhlam mynta u snem ki kynthup, ka Behdeiñkhlam jong ka Sieñ Raij Shyrmang kaba la pynkut myn ha ka 1 tarik u jymmang 2022, bud sa ka Seiñ Raij Jowai, kaba la pynkut ha ka 14 tarik u naitung, nangta pat ka Seiñ Raij Tuber ka ban sdang naduh ka 19 tarik bad kan kut ha ka 22 tarik, ka Behdeiñkhlam jong ka Seiñ Raij Ïalong ka ban kut ha ka 7 tarik u nailar, ka Seiñ Raij Muthlong ka ban kut ha ka 8 tarik u nailar bad bud sa ka Behdeiñkhlam jong ka Seiñ Raij Sohkymphor ka ba yn pynlong ha ka 16 tarik u nailar, bud pat sa ka Seiñ Raij Mukhla ka ba yn pynkut ha ka 23 tarik u nailar.
Ka Behdienkhlam jong ki saw tylli ki Seiñ Raij ba ju tip ruh kum ki Saw Lyngdoh ba kynthup ka Seiñ Raij Jowai, ka Seiñ Raij Ïalong, ka Seiñ Raij Tuber bad ka Seiñ Raij Shyrmang, kine ki dei kiba ju leh ïa ka jingleh niam haduh saw sngi lynter, ha kaba ha ka sngi kaba nyngkong lane ka sngi ba sdang ïa ka Behdeiñkhlam, u Lyngdoh u pyndep ïa ka jingleh niam ha kaba ha ka sngi kaba yn sdang ïa ka jingleh niam kin kiew ki phang wah sha ka phang neng bad ha ka sngi kaba bud pat kin hiar noh ki phang neng sha phang wah, ha ka sngi kaba lai sngi ki phang wah ki leit rah ïa ka bhang sha khlaw bad ki phang neng ruh ki rah ïa ka bhang sha khlaw kñia (ha Jowai ki rah da u khnong ym dei u bhang) bad ha ka sngi ba lai ha shwa ban leit rah ïa ki bhang, ki Lyngdoh ki leit kñia shwa sha ki khlaw kyntang bad ïa ki bhang ym pat ioh ban rah na khlaw kat ba kim pat dep ïa ka kñia ka khriam bad ynda la dep ka jingleh niam kñia kin sa ïa shim ïa ki bhang bad ki Lyngdoh ki ju ai ruh uwei u klong ïa ka phang wah bad uwei u klong ïa ka phang neng bad lyngba u Pyrnah, kata ha shwa ba kin ktah ïa u dieng Bhang dei ban da ai ka nguh ka dem, ha ka sngi ba saw u Lyngdoh, ki wasan kin pyndep ïa ka jingleh niam ha ka por dang step, la kumno kumno ki dei ban pyndep ha ka por 7-8 baje mynstep bad nangta pat ki paidbah na ki shnong bapher bapher jong ki Seiñ Raij bapher bapher kin sa ïa sdang ban ïa mih nala ki shnong ki thaw ban leit pynpoi ïa ki rong sha ka lympung kaba ju khot ka Aitnar kaba don ha Tuber Kmaishnong
Ha kaba ïadei bad ka jingrah ïa ki Bhang la ong ba mynta u snem ka phang neng kan rah ïa u Bhang na shnong Cham Cham bad ka phang wah kan rah ïa u bhang na shnong Kyndong Tuber.
Ki don haduh 35 tylli ki shnong kiba hap hapoh ka lympung Behdeiñkhlam jong ka Seiñ Raij Tuber bad ha kane ka lympung ki ju wan pynpoi ruh shibun bha ki rong na ki shnong bapher bapher ha ka lympung jong ka Biar ha Aitnar.