La sdang ïa ka District Level Inter School Athletic Meet ha East Jaiñtia Hills District

Khliehriat, Jymmang, 18: Ka ophis jong u District Sport Officer East Jaiñtia Hills District, hynnin ka sngi ka la pynlong ïa ka jingialehkai sport, ka ba lai sngi, ka District Level Inter School Athletic Meet 2022, kaba la pynlong ha madan Teilang Playground, Dkhiah West, East Jaiñtia Hills District, ha kaba u Deputy Commissioner ka East Jaiñtia Hills, u Abbhilash Banarwal, IAS u la wan ban plie ïa kane ka jingialehkai sport.
Haba kren kum u kongsan, u Abhilasah Banarwal, u la ai ka jingiaroh ïa baroh ki nongïalehkai sport kiba na ki skul bapher bapher bad ula pynshlur bad ai mynsiem ruh ïa ki ba kin trei shitom ban nangkiew shuh shuh ha ka kam ialehkai sport, ban poi sha ka thong wat hapdeng shibun ki jingeh, u la ong ruh ba ka jingialehkai sport kan ïarap ïa ki khynnah ban long kiba ryntih ban don ka mynsiem ïaleh ban poi sha ka thong,
Ha une u snem ka jingïalehkai sport (athletic meet), ki la wan ban ïashim bynta haduh 23 tylli ki skul kiba napoh ka district ha ki jingialehkai sport bapher bapher, kiba kynthup ïa ka jingïamareh thong kaba 60 mitar, ka 4X100 mitar relay, ka Discus Throw, Javelin Throw, Shot Put, High jump bad Long Jump kaba la phiah ha ki lai bynta, kata kito kiba hapoh ka 14 snem, kiba hapoh 16 snem kyrta bad kito kiba hapoh ka 18 snem kyrta na ka bynta ki kynthei bad shynrang.
Kiba la ïadonlang ha kane ka sngi, ki kynthup ruh ka District Sport Officer East Jaiñtia Hills District, ka kong Stephanie, u bah M. Rapsang, u General Secretary, East Jaintia District Sports Association, u bah Coming One Joy Tlang bad kiwei kiwei.
Kane ka jingïalehkai sport ka kham long kyrpang mynta u snem namar la rakhe kyrpang ruh ïa ka jingdap san phew snem ka jingïoh jylla ka Meghalaya.