Nongpoh, Jylliew 06: Na ka bynta ban ban ai jinghikai sha ki nongshong shnong ba kin tip ïa ki lad jingïada ha ka por ba don kano kano ka jingjia ba sngewsih, lyngba ka skhim ba la tip kum Upscale Aapda Mitra la sdang ban plie ne ban ai jinghikai sha ki paidbah mynta ka sngi shi bynta ba kin tip ïa kita ki lad ki lynti kumno ban ïarap ïa kiwei lada don kino kino ki jingjia ba sngewsih.
Kane ka jingai jinghikai ka dei kaba 12 sngi lynter ba la plie paidbah mynta ka sngi ha ka prokram kaba la pynlong ha State Institute of Rural Development, Nongsder, ha kaba la wan ban shim bynta da u Bah M.B Tongper, Additional Deputy Commissioner ka Ri Bhoi kum u kongsan halor ka jingplie ne ban pyntreikam ïa katei ka skhim kyrpang ban ai jinghikai sha ki paidbah halor ki lad jingïada haba don kano kano ka jingjia ba sngewsih la ka long ka jingshlei um, ka jingkhie jumai ne kiwei kiwei ki jingjia ryngkhat kiba ktah ïa ki paidbah.
Haba plie paidbah ban sdang ka prokam ai jinghikai lyngba katei ka skhim ba la tip kum ka Upscale Aapda Mitra la don ryngkat ruh naduh ka Kong K.Wanniang DDMO, ka Kong M.Kharkongngor, Consultant DDMA bad u Bah S.Syiemiong Sub-Inspector Civil Defence & and Homeguards Department bad kiwei kiwei ki ophisar sorkar.
Kane ka prokram ka la sdang ban pyntreikam naduh ka 6 tarik u Jylliew 2022 haduh ka 18 tarik u Jylliew 2022 ha kaba la pynlong da ka District Disaster Management Authority, Ri Bhoi District bad ki don haduh 33 ngut kita ki Community Volunteers na ki shnong bapher bapher ka Ri Bhoi ki ban ioh ïa ka jinghikai ban pyntbit kumno ban ai jingïada ne ïarap ïa ki paidbah ha ka por ba don kano kano ka jingjia ba sngewsih (Calamities).
Ka Kong K.Wanniang, kaba dei ka District Disaster Management Officer ka Ri Bhoi ka la ai ka jingkren ban pynshai halor ka jingthmu jong kane ka prokram ai jinghikai ban pynsngewthuh shai kdar ïa kita ki Community Volunteer ba kin don kata ka jingkitkhlieh ban ai jingïarap kyrkieh lada don kano kano ka jingjia ba sngewsih.
Ka la ïathuh ruh ba ki don 5 tylli ki District ha ka jylla ba la shah jied ban pyntreikam ïa kane ka skhim ba la itp kum ka Upscale Aapada Mitra ha kaba ha Ri Bhoi la jied haduh 100 ngut kita ki Community Volunteer ba kin ioh ïa ka jinghikai shaphang ki lad ki lynti ban ïada ne ai jingïarap kyrkieh haba don ki jingjia ba sngewsih bad ki samla na ka NYK, Home guard, Civil Defence kiba la pyntbit ha kane ka kam kin ai jinghikai sha kita ki Community Volunteer.
Na ka liang u Bah M.B Tongper kum u ADC bad uba dei ruh u CEO ka District Disaster Management Authority ka Ri Bhoi haba kren ha kane ka sngi u la pynpaw ka jingkmen ba la lah ban pyntreikam ïa katei ka skhim bad kum ki paidbah ki dei ban don lypa ka jingtip ban shim ïa kita ki lad jingïada lada don kano kano ka jingjia ba sngewsih la ka dei ka jingshlei um, ka jingpluh ding, u jumai bad kiwei kiwei ki jingjia ba sngewsih.
Namarkata, u la kyntu ruh ïa ki khun samla kiba la ioh ïa ka jinghikai ban pyntbit ha kane ka kam ki dei ban pyndonkam hok ïa ki lad jinghikai ba ki la ioh lum, namar ngim lah ban tip ha kano kano ka por kin don ki jingjia ba sngewsih bad lada ngi la long kiba la ioh jinghikai lypa ngin lah ban ïarap shibun ïa ki paidbah ban lait na ka jingjia ba sngewsih ne ki jingma ki jingmynsaw, u la bynrap.
