La sam ïa ka song pisa kaba T. 25 lak tam sha ki 37 tylli ki Farmer Producer Groups ha Mawkyrwat C&RD Block

Mawkyrwat, Jylliew 02: Ka ophis jong ka Meghalaya Basin Management Agency (MBMA) ha ryngkat ka jingïatreilang bad ka Enterprise Facilitation Centre (EFC) napoh ka ophis jong u Block Development Officer jong ka C&RD Block Mawkyrwat mynta ka sngi ki la sam ïa ka song lyngba ki cheques kaba kot haduh T. 25,35,000/- (arphew san lak lai phew san hajar) tyngka sha ki 37 tylli ki “Farmer Producer Groups kaba dei na ka projek Farmers Collectivisation For Upscaling Production & Marketing System” (FOCUS) ha ka jingïalang ïamir bad ïa phylliew jingmut kaba la long ha Multipurpose Hall jong ka DC’s ophis Mawkyrwat.
Ha kane ka sngi u bah Renikton Lyngdoh Tongkhar, Myntri jong ka tnat PHE jong ka Jylla Meghalaya u ba long artad kum u MLA Mawkyrwat Constituency u la long u kongsan ha ryngkat ka jingïadonlang ka kong C. Kharkongngor, IAS, Deputy Commissioner jong ka South West Khasi Hills District, u bah Commander Shang-pliang, President ka Hills Farmers Union Central Body, u bah W. Biam, Additional Deputy Commissioner, South West Khasi Hills District, u bah I. Lawrynñiang, MCS, Block Development Officer, Mawkyrwat C&RD Block lem bad kiwei kiwei.
U bah Renikton Lyngdoh Tongkhar ha ka jingkren jong u, u la ong ba ka thong ba ha khmat jong ka sorkar MDA ka long ban pynkhlaiñ bad kyntiew ïa ki nongrep na ka bynta ban pynheh pynïar ïa ka rep ka riang namar ki nongrep ki dei u budlum jong ka ïoh ka kot. U la kyntu bad pynshlur ïa ki nongrep ban pyndonkam bad pyntreikam hok ïa ine i jingïoh iba rit i ban long ka jingmyntoi bad ka jingkyrkhu ïa ki da kaba pyni ba u briew barobor u kiew na i jingïoh iba rit bad dei lyngba ka jingnang ban pyntyllun bad pyntreikam ryngkat ka jingtreishitom bad ka minot kaba lah ban pynroi pynkiew na iba rit sha kaba heh da kaba khmih lynti ba nangne yn mih ki Co-operative Societies ki ban don la ka jong ka kompeni kaba lah ban shna bad pynïaid ïew hi ïa ki mar rep bad ban lah ban pynurlong ïa ka jingangnud bad jingthmu jong ka sorkar na ka bynta ban kyntiew ïa ki nongrep ha kiba bun ki liang.
Lyngba kane ka sngi u kyrmen ruh ba ka jingdon jong kine ki Farmer Producers Groups kan long ha kajuh ka por na ka bynta ban wanrah ka jingïajan bad ka jingïasngewthuh jingmut hapdeng jong ki bad dei kane ka jingïatylli kaba long ka bor bad kaba donkam bha ha kum kine ki por na ka bynta ban wanrah ïa ka jingkylla ha ka imlang sahlang ha ka dong ka thaiñ baroh kawei.
Ka kong C. Khar-kongngor, IAS, Deputy Commissioner jong ka South West Khasi Hills District ka khmih lynti ba lyngba kane ka projek ki nongrep kin lah ban pynroi bad ban kham pynbha ïa ka kam rep na ka bynta ban pynmih ki mar kiba bha kham bun na ka bynta ban pynïaid ïew bad shalan shabar bad ban lah ban pynbiang ïa ka jingdawa kat kum ki jingdonkam. Ka la kyntu ïa ki nongrep ba kin nym pyndonkam bakla ïa kane ka pisa hynrei ban nang pynmih bun ki mar kiba lah ban kyntiew ïa ka kamai kajih bad ha kajuh ka por ka la pynshlur ïa ki ban wad ki lad ki lynti na ka bynta ban ïoh ban ai jaka na ka bynta ban shna ïa ki kynja kompeni kiba lah ban wanrah ka jingkylla ha ka dong ka thaiñ.
Kham ha shwa, u bah Commander Shangpliang, President ka Hills Farmers Union Central Body ha ka jingkren lamphrang u la ong ba la lah ban form haduh 450 tylli ki Farmer Producer Groups bad palat 5 hajar tam ki nongrep ha kane ka dong ka thaiñ na ka bynta ban lum bad pynïatylli ïa ki nongrep bad ruh ban ïarap ban pynïar bad pyntyllun ïa ka rep ka riang, ban pynïaid ïew ïa ki mar rep kum u synsar, u ‘latyrpad, u sohmrit bad u piskot bad kumjuh ban kyntiew ïa ka kamai kajih jong ki.
Shuh u la ong ba lyngba kane ka projek FOCUS ba la pyntreikam da ka Meghalaya Basin Management Agency (MBMA) ba la ïoh ban sam mar 5 hajar tyngka uwei u nongrep da ka jingthmu ban ai jingïarap ïa ki (nongrep) ban thied symbai da kaba kyntu ïa ki nongrep ban pyndonkam hok ïa kane ka pisa ha ka ban pynheh pynïar ïa ka rep ka riang. Ha kajuh ka por u khmih lynti ba lyngba ka jingïatreilang bad ka jingïasngewthuh jingmut jong ki shen yn lah ban kyntiew ïa ki sha ki Co-operative Societies lane ki kompeni kiba heh kum ka AMUL Factory ha Gujarat kaba la pynïaid bad longtrai hi da ki nongrep.
Hadien kane ka la don ruh ka jingïamir jingmut ha kaba ïa dei bad ka rep ka riang.
Ka kong Jean Mary Lyngdoh, Center Manager jong ka Focus Mawkyrwat C&RD Block ka la pynpaw ïa ki jinglap jingshem bad ki jingeh kiba ka ïa kynduh ha kaba ïa dei bad kane ka kam.
La ïoh ruh ka jingkren na u bah Armstrong Shylla halor ka jingshem bad jingsngew jong u ha kaba ïa dei bad ka jingseng ïa ki Farmer Producer Groups bad kumjuh ruh na kiwei pat ki nongrep.
Kham ha shwa ka kong Jean Mary Lyngdoh, Center Manager (Focus) ka la ai ïa ka jingkren pdiang sngewbha katba ka kong Bansuk Syiem, Block Programme Manager, EFC, Mawkyrwat C&RD Block ka la ai ïa ki kyntien khublei.